خیبرپختونخوا حکومت کا پولیس کو جدید ہتھیاروں سے لیس کرنے کا فیصلہ، 5.5 ارب روپے جاری
صوبائی حکومت نے خیبرپختونخوا پولیس کو دہشت گردی کے خلاف مزید مؤثر بنانے کے لیے جدید ہتھیاروں اور آلات سے لیس کرنے کا فیصلہ کیا ہے۔ اس مقصد کے لیے فوری طور پر ساڑھے 5 ارب روپے جاری کیے گئے ہیں۔
پولیس کی گاڑیوں کی بلٹ پروفنگ اور دیگر جدید آلات کی خریداری کے لیے 3 ارب روپے جاری کیے گئے ہیں۔ علاوہ ازیں، تمام اضلاع میں جدید آلات سے لیس اسپیشل ویپن اینڈ ٹیکنیکل ٹیمیں بنانے کا فیصلہ کیا گیا ہے اور تھانوں اور چیک پوسٹوں کو محفوظ بنانے کے لیے 1.3 ارب روپے فراہم کیے گئے ہیں۔
مزید برآں، سالانہ ترقیاتی پروگرام میں شامل تھانوں اور چیک پوسٹوں کی تعمیر کے باقی ماندہ منصوبوں کے لیے 50 کروڑ روپے مختص کیے گئے ہیں۔ پولیس کے لیے نائٹ ویژن گوگلز، اسنائپرز اور دیگر آلات کی خریداری کے لیے 72 کروڑ روپے جاری کیے گئے ہیں۔
صوبائی حکومت نے پولیس افسران کی تنخواہیں بلوچستان پولیس کی تنخواہوں کے مساوی کرنے کا اصولی فیصلہ بھی کیا ہے، جبکہ پولیس اہلکاروں کی تنخواہیں پنجاب پولیس کے اہلکاروں کی تنخواہوں کے مساوی کرنے کا بھی فیصلہ کیا گیا ہے۔
