صوبائی وزیر پختون یار خان کا بنوں دھماکے سے متاثرہ علاقے کا دورہ، لواحقین سے ملاقات

خیبر پختونخوا کے صوبائی وزیر برائے پبلک ہیلتھ انجینئرنگ پختون یار خان نے چیف سیکرٹری شہاب علی شاہ اور آئی جی خیبرپختونخوا ذوالفقار حمید کے ہمراہ بنوں کے دھماکے سے متاثرہ علاقے کا دورہ کیا۔ اس موقع پر کمشنر بنوں ڈویژن محمد علی شاہ، ڈی آئی جی عمران شاہد، ڈپٹی کمشنر بنوں عبدالحمید خان اور ڈی پی او ضیاءالدین احمد بھی موجود تھے، جہاں انہوں نے جائے وقوعہ کا معائنہ کیا اور شہید مسجد کا جائزہ لیا۔

صوبائی وزیر پختون یار خان نے اہل علاقہ کو مسجد کی از سرِ نو تعمیر سمیت تمام نقصانات کے ازالے کی یقین دہانی کرائی۔ بعد ازاں، انہوں نے دھماکے میں جاں بحق افراد کے لواحقین سے ملاقات کی اور مرحومین کے لیے فاتحہ خوانی کی۔ اس موقع پر انہوں نے دکھ اور افسوس کا اظہار کرتے ہوئے دعا کی کہ اللہ تعالیٰ مرحومین کو جنت الفردوس میں جگہ دے۔

میڈیا سے گفتگو کرتے ہوئے پختون یار خان نے کہا کہ صوبائی حکومت بنوں کے واقعے پر غم زدہ ہے اور جلد ہی نقصانات کا ازالہ کیا جائے گا۔ انہوں نے مزید بتایا کہ ضلعی انتظامیہ کی سروے ٹیم نے علاقے کا سروے مکمل کر لیا ہے اور نقصانات کا ازالہ جلد کر لیا جائے گا۔ انہوں نے شہداء کے خاندانوں کو پیکج دینے کا بھی اعلان کیا۔

صوبائی وزیر نے حکومت خیبر پختونخوا کی جانب سے امن و امان کے قیام کے لیے جاری کوششوں کا ذکر کرتے ہوئے عوام سے اپیل کی کہ وہ بنوں کو امن کا گہوارہ بنانے کے لیے حکومت کا ساتھ دیں تاکہ امن کا قیام ممکن ہو سکے۔ انہوں نے کہا کہ حکومت ایسی کارروائیوں کے خلاف ہے اور ہمیشہ رہے گی۔