کاش قذافی اسٹیڈیم جیسی رونقیں پشاور میں بھی لگیں، وزیر دفاع خواجہ آصف

سیالکوٹ میں نیوز کانفرنس کرتے ہوئے وزیر دفاع خواجہ آصف نے کہا ہے کہ پاکستان تحریک انصاف (پی ٹی آئی) کے پر امن احتجاج پر ہمیں کوئی اعتراض نہیں ہے۔ مگر گزشتہ 2 سال سے پی ٹی آئی کی جو روایت رہی ہے، اس کے مطابق ہر احتجاج پرتشدد ہوتا ہے۔ اس احتجاج کو عالمی سطح کے اسپورٹس ایونٹ کے ساتھ منسلک کر دیا گیا، تاکہ پاکستان کا امیج پھر خراب ہو، ہم تو کہتے ہیں کاش قذافی اسٹیڈیم جیسی رونقیں پشاور میں بھی لگیں۔

انکا مزید کینا تھا کہ حکومت اور ن لیگ کی قیادت عوامی مسائل سے پوری طرح با خبر ہے، وزیراعظم شہباز شریف کی قیادت میں پاکستان بہتری کی جانب جارہا ہے۔ ایک سال میں وہ کام ہوگئے، جن کی توقع ہم دو سال میں ہونے کی کر رہے تھے۔ اس حکومت میں مہنگائی 38 سے ڈھائی فیصد کی شرح پر آگئی ہے اور معیشت بہتری کی جانب گامزن ہے، پی آئی اے بحال ہورہی ہے، اسٹاک مارکیٹ ایک لاکھ 18 ہزار پر چلی گئی، زرمبادلہ ذخائر بلند سطح پر ہیں، پاکستان کا قومی وقار بلند ہو رہا ہے۔

مزید برآں وزیر دفاع خواجہ آصف نے کہا ہے کہ بجلی کو مرحلہ وار مزید سستا کیا جائے گا، وزیراعظم نے بجلی کی قیمتیں مزید کم کرنے کے لئے اجلاس کی صدارت کی ہے، عنقریب عوام کو خوش خبری ملے گی، اجلاس میں اس معاملے پر طویل بحث ہوئی، ایک ڈیڑھ سال میں بڑی تبدیلیاں آپ کو نظر آئیں گی۔