حج پالیسی 2025 کا اعلان: اخراجات 10 لاکھ 75 ہزار روپے سے 11 لاکھ 75 ہزار روپے کے درمیان متوقع
پاکستان کے شہریوں کے لئے حج 2025 کی پالیسی کا اعلان کردیا گیا ہے، جس کے تحت ایک لاکھ 79 ہزار 210 پاکستانی شہری حج کی سعادت حاصل کر سکیں گے۔ وفاقی وزیر مذہبی امور چوہدری سالک حسین نے لاہور میں پریس کانفرنس کرتے ہوئے حج پالیسی 2025 کے اہم نکات کی تفصیلات فراہم کیں۔
حج کا کوٹہ اور اخراجات
پاکستان کے لئے 2025 میں حج کا مجموعی کوٹہ ایک لاکھ 79 ہزار 210 مقرر کیا گیا ہے۔ ان میں سے 89 ہزار 605 نشستیں سرکاری اور نجی حج اسکیموں کے لئے مختص کی گئی ہیں۔ وفاقی وزیر نے بتایا کہ سرکاری حج اسکیم کے تحت درخواستیں 18 نومبر سے 3 دسمبر تک وصول کی جائیں گی، اور 6 دسمبر کو حج قرعہ اندازی کا عمل مکمل ہوگا۔
سرکاری حج اسکیم کے تحت حج کے اخراجات 10 لاکھ 75 ہزار روپے سے لے کر 11 لاکھ 75 ہزار روپے تک متوقع ہیں۔ وزیر مذہبی امور نے مزید کہا کہ ان اخراجات میں اضافی سہولتوں کی قیمت میں قربانی کی رقم بھی شامل ہے، جو 55 ہزار روپے ہے۔
پیکجز اور قسطوں کا نظام
حج کے لئے سرکاری اسکیم میں دو مختلف پیکجز متعارف کرائے گئے ہیں۔ روایتی لانگ پیکج جس میں 38 سے 42 دن لگیں گے، اور شارٹ پیکج جو 20 سے 25 دن پر مشتمل ہوگا۔ اس کے علاوہ، وزیر مذہبی امور نے بتایا کہ حج واجبات کی پہلی قسط 2 لاکھ روپے کی صورت میں حج درخواست کے ساتھ جمع کرانا ضروری ہوگا، جبکہ قرعہ اندازی کے بعد 10 دن کے اندر مزید 4 لاکھ روپے جمع کروانے ہوں گے۔ بقیہ رقم یکم تا 10 فروری 2025 کے درمیان ادا کرنا ہوگی۔
اسپانسر شپ اسکیم
چوہدری سالک حسین نے حج پالیسی 2025 کے تحت اسپانسر شپ اسکیم کی بھی تفصیلات دی۔ اس اسکیم کے تحت 5 ہزار نشستیں سرکاری حج اسکیم میں مختص کی جائیں گی، جبکہ نجی حج اسکیم میں اسپانسر شپ کے لئے 30 ہزار نشستیں مختص کی جائیں گی۔ ان نشستوں کا اجر "پہلے آئیے، پہلے پائیے” کے اصول پر ہوگا۔
آگاہی اور درخواستیں
حج کی درخواست دینے والے شہریوں کو آگاہ کیا گیا ہے کہ وہ 18 نومبر سے 3 دسمبر تک درخواستیں جمع کروا سکتے ہیں۔ حج قرع اندازی کے بعد کامیاب امیدواروں کو حج کے لئے منتخب کیا جائے گا اور متعلقہ رقم کی ادائیگی کے عمل کی تفصیلات فراہم کی جائیں گی۔
