پشاور بی آر ٹی کوریڈور میں ایک شخص کی فائرنگ کی وجہ سے سکیورٹی گارڈ زخمی ہوگیا۔ ٹرانس پشاور ترجمان کے مطابق آج صبح کالے رنگ گاڑی میں سوار ایک شخص بی آر ٹی کوریڈور میں داخل ہوا۔ مذکورہ شخص نے چمکنی کے انٹری پوائنٹ پر کوریڈور میں داخل ہونے کی کوشش کی۔
گارڈز کے روکنے پر اس نے ان پر گاڑی چڑھانے کی کوشش کی اور کوریڈور میں داخل ہوا۔ ترجمان کا کہنا ہے کہ چغلپورہ سٹاپ پر اور ریلوے سٹیشن سٹاپ کے قریب شخص کو روکنے کی کوشش کی گئی۔
ریلوے سٹیشن سٹاپ کے قریب کوئیک ریسپانس ٹیم نے شخص کو روکنے کی کوشش کی جس کے بعد اس شخص نے گارڈ پر فائرنگ کر کے اسے زخمی کیا اور فرار ہو گیا۔
زخمی گارڈ کو ہسپتال منتقل کردیا گیا ہے جہاں اس کی حالت خطرے سے باہر بتائی جارہی ہے۔
ترجمان ٹرانس پشاور کا کہنا ہے کہ بی آر ٹی کوریڈور میں داخل ہونے والا شخص گرفتار ہو گیا ہے جس سے مزید تفتیش جاری ہے۔
