نیشنل کمانڈ اینڈ آپریشن سینٹر کے سربراہ اسد عمر نے عوام سے ایس او پیز پر عمل کرنے اور ویکسین لگوانے کی اپیل کی ہے۔ ٹوئٹر پر جاری بیان میں اسد عمر نے کہا کہ خطے میں پاکستان اور دیگر ممالک میں کورونا سے ہونے والی اموات کا جائزہ پیش کیا۔
اسد عمر نے بتایا کہ ہمارے خطے کے مختلف ممالک میں 10 لاکھ کی آبادی میں کورونا کی شرح اموت کچھ اس طرح ہیں، ایران میں 10 لاکھ میں 1037، نیپال 326، بھارت 301، سری لنکا 186، افغانستان 160، بنگلادیش 113 اور پاکستان میں 102 اموات ہوئیں۔
Covid deaths/million population in our region: Iran 1037, Nepal 326, India 301, Sri Lanka 186, Afghanistan 160, Bangladesh 113, Pakistan 102. Timely decisions, hard work, cooperation of people & blessings of Allah made this possible. Risk is not over. Follow sop's & vaccinate.
— Asad Umar (@Asad_Umar) July 24, 2021
انہوں نے کہا کہ بروقت فیصلوں، محنت، لوگوں کے تعاون اور اللہ کے فضل سے یہ ممکن ہوا لیکن خطرہ ختم نہیں ہوا، ایس او پیز پر عمل کریں اور ویکسین لگوائیں۔
دوسری جانب ملک میں عالمی وبا کورونا سے مزید 32 افراد انتقال کر گئے جبکہ 1841 نئے کیسز بھی رپورٹ ہوئے ہیں۔ پاکستان میں کورونا کے اعداد و شمار بتانے والی ویب سائٹ کے مطابق گزشتہ 24 گھنٹوں کے دوران ملک بھر میں کورونا کے 37 ہزار 636 ٹیسٹ کیے گئے جن میں سے 1841 افراد میں وائرس کی تصدیق ہوئی جب کہ وائرس سے 32 افراد انتقال کر گئے۔ سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 4.89 فیصد رہی۔
سرکاری پورٹل کے مطابق ملک میں کورونا سے ہلاکتوں کی تعداد 22971 ہو گئی اور مجموعی کیسز 10 لاکھ 1875 تک جاپہنچے ہیں۔
اس کے علاوہ 24 گھنٹوں کے دوران ملک بھر میں 1310 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 9 لاکھ 24 ہزار 782 ہو گئی ہے جب کہ فعال کیسز کی تعداد 54122 ہے۔
