افغانستان، انسانی حقوق کی سرگرم کارکن فریشتہ کوہستانی بھائی سمیت قتل
افغانستان میں انسانی حقوق کی سرگرم کارکن فریشتہ کوہستانی کو بھائی سمیت قتل کر دیا گیا۔
افغانستان کے صوبہ کپیسا کے ضلع کوہستان میں نامعلوم افراد موٹرسائیکل سواروں نے معروف افغان سماجی کارکن فریشتہ کوہستانی کو فائرنگ کر کے قتل کر دیا جس کی ذمہ داری اب تک کسی گروپ نے قبول نہیں کی ہے۔
فائرنگ کے واقعے میں فریشتہ کوہستانی کے بھائی بھی شدید زخمی ہوئے تھے جنہیں طبی امداد کے لیے قریبی ہسپتال منتقل کر دیا گیا تاہم پولیس نے دعویٰ کیا ہے کہ فائرنگ کے واقعے میں ان کے بھائی بھی جاں بحق ہو چکے ہیں۔
BREAKING: Female Afghan activist, Freshta Kohistani, killed along with her brother in central Kapisa province, security source tells 1TV pic.twitter.com/6RPZi6K6ZA
— 1TVNewsAF (@1TVNewsAF) December 24, 2020
افغانستان کے وزارت داخلہ نے انسانی حقوق کی کارکن فریشتہ کوہستانی کی موت کی تصدیق کرتے ہوئے کہا کہ انٹیلی جنٹس یونٹ نے اس حملے کے حوالے سے تحقیقات کا آغاز کر دیا ہے اور جلد ذمہ داروں کے خلاف کارروائی عمل میں لائی جائے گی۔
واضح رہے گزشتہ روز ہی افغانستان کے فری اینڈ فیئر الیکشن کے سربراہ یوسف رشیدی کو بھی نامعلوم افراد نے فائرنگ کر کے قتل کر دیا تھا جب کہ واقعے میں ان کا ڈرائیور بھی جاں بحق ہو گیا تھا۔
اس سے قبل 22 دسمبر کو افغانستان کے معروف صحافی رحمت اللہ نیک زاد کو ان کے گھر کے پاس ہی گولی مار کر اس وقت قتل کر دیا گیا تھا جب وہ قریب کی ایک مسجد کی طرف جا رہے تھے۔
