پاکستان کرکٹ ٹیم کے بیٹر بابر اعظم نے آج کراچی کے نیشنل بینک کرکٹ ایرینا میں تین ملکی سیریز کے فائنل میچ میں نیوزی لینڈ کے خلاف بیٹنگ کرتے ہوئے 6 ہزار رنز کا سنگ میل عبور کیا۔ بابر نے 10 واں رن مکمل کرتے ہوئے یہ کامیابی حاصل کی۔
بابر اعظم نے 123 اننگز میں 6 ہزار رنز بنا کر ہاشم آملہ کا ریکارڈ برابر کیا، اور اس کے ساتھ ہی وہ مشترکہ طور پر تیز ترین 6 ہزار رنز بنانے والے کھلاڑی بن گئے ہیں۔
بابر اعظم اس کامیابی کو حاصل کرنے والے تیز ترین ایشین کھلاڑی بھی ہیں، کیونکہ بھارت کے ویرات کوہلی نے 136 اننگز میں 6 ہزار رنز مکمل کئے تھے۔
بابر اعظم اس سنگ میل کو عبور کرنے والے 11 ویں پاکستانی بیٹر ہیں۔ ان سے قبل انضمام الحق، محمد یوسف، سعید انور، شاہد آفریدی، شعیب ملک، جاوید میانداد، یونس خان، سلیم ملک، محمد حفیظ اور اعجاز احمد بھی 6 ہزار ون ڈے رنز بنا چکے ہیں۔
