ضلع خیبر: کراچی سے شروع 12ویں وینٹج کار ریلی لنڈیکوتل مچینی چیک پوسٹ پہنچ گئی۔
نمائندہ ٹی این این کے مطابق کراچی سے شروع ہونے والی 12ویں وینٹج کار ریلی ضلع خیبر جمرود باب خیبر سے گزرتی ہوئی لنڈی کوتل میچنی چیک پوسٹ پہنچ گئی، ریلی میں 40 گاڑیاں شامل ہیں۔
وینٹج کار ریلی کے منتظم عاصم درانی نے میڈیا سے گفتگو کرتے ہوئے کہا کہ ریلی کا بنیادی مقصد پوری دنیا کو پاکستان کا امن کا پیغام دینا ہے، ”پاک آرمی فرنٹیئر کور سیکورٹی فورسز کی قربانیوں کی وجہ سے ملک اور علاقے میں امن قائم ہوا اور اب سیاح خیبر پختونخوا اور قبائلی علاقوں کے تفریحی مقامات کے لئے بہت شوق سے آتے ہیں اور یہاں کی سیر و سیاحت سے لطف اندوز ہوتے ہیں جس کی زندہ مثال مذکورہ وینٹیج کار ریلی ہے جو کراچی سے شروع ہو کر ضلع خیبر لنڈیکوتل مچینی چیک پوسٹ تک پرامن طریقے سے پہنچ گئی ہے۔”
وینٹیج کار ریلی کے شرکاء میں بچے اور خواتین بھی شامل تھے، لنڈی کوتل مچینی چیک پوسٹ پر وینٹیج کار ریلی کے شرکاء کو ضلع خیبر کے تاریخی مقامات بارے بریفنگ دی گئی اور بعد میں وینٹج کار ریلی لنڈیکوتل میچنی چیک پوسٹ سے واپس لنڈی کوتل چھاؤنی خیبر میس گئے جہاں پر ان کو لنچ کا اہتمام کیا گیا تھا، بعدازاں ریلی واپس پشاور روانہ ہو گئی۔
وینٹج کار ریلی کے شرکاء نے بہتر انتظامات پر پاک آرمی اور ایف سی حکام کا خصوصی شکریہ ادا کیا ہے۔
