وفاق کو اعتماد میں لے کر جلد ایک وفد افغانستان بھیجیں گے۔ علی امین گنڈاپور

وزیراعلیٰ خیبر پختونخوا علی امین گنڈاپور نے کہا ہے کہ وفاقی حکومت کو اعتماد میں لے کر جلد ایک وفد افغانستان بھیجیں گے۔

ذرائع کے مطابق پاکستان اور افغانستان میں قیام امن کے لیے افغانستان جرگہ بھیجنے کے معاملے پر خیبر پختونخوا حکومت نے افغان حکومت سے راطبہ کیا تاہم امارات اسلامی افغانستان کے 2 اہم حکومتی عہدیدار سعودی عرب کے دورے پر ہیں جس کی وجہ سے ملاقات میں تاخیر ہو رہی ہے۔

ذرائع کا کہنا تھا کہ ابتدائی بات چیت کے لیے پہلے مشیر اطلاعات کے پی بیرسٹر محمد علی سیف اور قبائلی عمائدین پر مشمل چھوٹا وفد افغانستان جائے گا، مذاکرات میں پاک افغان سرحد کے اطراف قیام امن اور تجارتی تعلقات کے فروغ سمیت دیگر امور پر غور ہو گا۔

یہ بھی پڑھیں: کوئٹہ: بچوں کو پولیو سے بچاؤ کے قطرے نہ پلوانے پر 5 افراد گرفتار

ذرائع کے مطابق ابتدائی بات چیت کے بعد دونوں ممالک کے درمیان گرینڈ جرگہ ہو گا جس میں دونوں ممالک کے قبائلی عمائدین اور عہدیدار شریک ہوں گے۔

اس حوالے سے وزیراعلیٰ کے پی علی امین گنڈاپور نے کہا کہ افغانستان کی وجہ سے خیبر پختونخوا متاثر ہو رہا ہے؛ ٹی او آرز بنا کر اور وفاقی حکومت کو اعتماد میں لے کر جلد وفد افغانستان بھیجیں گے، بات چیت کے لیے جرگہ بنائیں گے جس میں مختلف اقوام کے نمائندے شامل ہوں گے۔