سیلاب کا پانی اترے گا تو گندم کی فصل بڑی اچھی ہو گی۔ عمران خان

سیلاب ہمارے لیے بڑا چیلنج مگر ہم مل کر اس مشکل سے نمٹیں گے۔ سابق وزیراعظم

ایڈیٹر ٹی این این 03/09/2022

اسمبلی سے اعتماد کا ووٹ سیاسی چال یا اخلاقی جرات

اس وقت ملکِ عزیز میں سیلاب نے ہر سو تباہی مچائی ہوئی ہے تاہم سابق وزیراعظم عمران خان کی نظر میں سیلاب نے ہمیں جہاں ناقابل تلافی نقصان پہنچایا وہیں اس کا ایک بہت بڑا فائدہ بھی ہو گا، سیلاب کا یہ فائدہ وہ ضلع راجن پور کی تحصیل روجھان کے سیلاب زدہ علاقوں کے دورے کے موقع پر سامنے لائے ہیں۔

سابق وزیراعظم عمران خان کو روجھان آمد پر سیلابی صورت حال پر بریفنگ دی گئی۔ بعدازاں میڈیا سے گفتگو کرتے ہوئے عمران خان نے کہا کہ ڈی آئی خان اور باقی علاقوں کو دیکھا کہ بہت بڑا علاقہ پانی کے نیچے ہے، جب یہ پانی اترے گا اس کا سب سے بڑا فائدہ یہ ہو گا کہ جب لوگ اپنی فصل اگائیں گے تو گندم جس کا انتظار اپریل تک کرنا پڑے گا تو وہ فصل بڑی اچھی ہو گی۔

انہوں نے کہا کہ سیلاب سے ملک بھر میں کتنا نقصان ہوا، اس کا ڈیٹا اکٹھا کرنا ہو گا، پی ڈی ایم اے کو نقصانات کا ڈیٹا اکٹھا کرنا چاہیے، اس سے بحالی کے کاموں میں مدد ملے گی۔

سابق وزیر اعظم کا کہنا تھا کہ ہزاروں ایکڑ زمین اس وقت پانی میں ڈوبی ہوئی ہے، سیلاب متاثرین کو مزید امداد کے معاملے پر بات کروں گا، سیلاب ہمارے لیے بڑا چیلنج ہے مگر ہم مل کر اس مشکل سے نمٹیں گے، اپنے نمائندوں سے کہتا ہوں سیلاب سے متاثرہ علاقوں میں جائیں، اس وقت سیلاب متاثرین کو مدد کی ضرورت ہے، سیلاب سے متاثرہ علاقوں میں مچھردانیاں فراہم کی جائیں، ہر جگہ سیلاب سے متاثر ہے، ہمیں ڈیموں کی ضرورت ہے۔

انہوں نے کہا کہ اس وقت لوگوں پر حقیقی معنوں میں مشکل وقت آیا ہوا ہے، ہمیں چاہیے کہ ہم یعنی ارکان صوبائی و قومی اسمبلی، حکومت اور میں، سب مل کر سیلاب متاثرین کی مدد کریں، آئندہ کے لیے ہم چاہتے ہیں کہ 2 ڈیموں کا بننا بہت ضروری ہے۔