گل حماد فاروقی
چترال بونی کے سامنے پہاڑی پر بلاسٹنگ سے ایک شخص زخمی ہوگیا جبکہ آٹھ گھروں کو جزوی نقصان پہنچا ہے۔ مقامی افراد کے مطابق بونی چترال سڑک کی کشادگی کیلیے پہاڑ میں دھماکہ کیا جارہا تھا جسکی وجہ سے ایک شخص زخمی ہوا جبکہ اٹھ گھروں کو جزوی نقصان پہنچا۔
مقامی افراد کے مطابق دھماکہ اتنا شدید تھا کہ بونی میں زلزلہ کی سی صورت حال پیدا ہوئی اور لوگ خوف و ہراس میں مبتلا ہوئے۔ تقریباً تین کلو میٹر تک دور جاکر پتھر لگنے سے آٹھ گھروں کو جزوی نقصان پہنچا جبکہ ایک جوان ممتاز حسین زخمی ہوگیا جسے فوری طور پر ہسپتال پہنچایا گیا۔ خبر ملتے ہی تحصیل چیئرمین سردار حکیم موقع پر پہنچ گئے اور حالات کا جائزہ لیا۔ ان کے ساتھ ویلیج چیئرمین بونی 2 انوار ولی خان بھی موجود تھے۔
تحصیل چیئرمین نے موقع پر پراجیکٹ منیجر سے رابطہ کرکے واقعے کی تفصیل ان تک پہنچائی جبکہ متعلقہ تھانہ بونی کو رپورٹ کرکے این ایچ اے کے خلاف ایف آئی آر کاٹنے کی درخواست دی۔ یاد رہے علاقے کے مکینوں نے بیس روز قبل ڈپٹی کمشنر اپر کو خطرات کی نشاندہی کی تھی پھر بھی کچھ نتائج برامد نہ ہو سکے۔
