جاپان کی گاڑیاں بنانے والی مشہور و معروف کمپنی سوزوکی کے چیئرمین اوسامو سوزوکی نے ریٹائرمنٹ کا اعلان کردیا۔
غیرملکی خبر ایجنسی کے مطابق 4 دہائیوں سے زائد عرصے تک سوزوکی کمپنی میں اعلیٰ عہدوں پر ذمہ داریاں سرانجام دینے کے بعد 91 سالہ اوسامو سوزوکی رواں سال جون میں چیئرمین کے عہدے سے ریٹائر ہو جائیں گے۔
وہ 22 سال تک اس کمپنی کے چیف ایگزیکٹیو رہے جبکہ اس کے بعد دو دہائیوں تک اس کمپنی کے چیئرمین کے طور پر فرائض سرانجام دیتے رہے۔
سوزوکی کمپنی کی جانب سے جاری بیان کے مطابق اوسامو سوزوکی جون میں ہونے والے شیئر ہولڈرز کے اجلاس کے بعد چیئرمین شپ چھوڑدیں گے اور کمپنی کے ساتھ مشیر کی حیثیت سے کام کریں گے۔
خیال رہے کہ اوسامو سوزوکی کا تعلق سوزوکی خاندان سے نہیں تاہم سوزوکی کمپنی کے بانی میچیو سوزوکی کی پوتی سے شادی کے بعد انہوں نے اپنے نام کے ساتھ سوزوکی لگا لیا تھا۔
