جامعہ پشاور کے وائس چانسلر کو الوداع کرنے کے لیے ملازمین گدھے کو وی سی دفتر لے گئے

پشاور یونیورسٹی اور عبدالولی خان یونیورسٹی کے وائس چانسلرز کے الوداعی دن ملازمین نے توہین آمیز سلوک کیا۔ رد عمل میں سابقہ وائس چانسلر عبدالولی خان یونیورسٹی ڈاکٹر ظہور الحق نے کہا کہ مجھے یونیورسٹی کے ساتھ ملازمین کی تربیت پر بھی کام کرنا چاہیے تھا۔

پشاور یونیورسٹی اور عبدالولی خان یونیورسٹی کے وائس چانسلرز کے الوداعی دن کی ویڈیوز سوشل میڈیا پر وائرل ہوئیں۔ جامعہ پشاور کے وائس چانسلر کو الوداع کرنے کے لیے ملازمین گدھے کو وی سی دفتر لے گئے۔ گدھے پر بیٹھ کر ملازمین نے وی سی کے جانے کی خوشی میں رقص کیا۔

عبدالولی خان یونیورسٹی کے وائس چانسلر اپنی ریٹائرمنٹ کے دن بھاگنے پر مجبور ہوگئے۔ ہجوم نے سابقہ وائس چانسلر کا پیچھا کیا اور شدید نعرہ بازی کی۔ توہین آمیز رویہ پر سابقہ وائس چانسلر عبدالولی خان یونیورسٹی ڈاکٹر ظہور الحق نے بتا کہ مجھے یونیورسٹی کے ساتھ ملازمین کی تربیت پر بھی کام کرنا چاہیے تھا۔

انہوں نے کہا کہ ملازمت کے آخری دن ہجوم نے میرا پیچھا کیا، اللہ نے مجھے بچایا، میں نے یونیورسٹی کی سالانہ انکم 74 کروڑ سے بڑھا کر 170 کروڑ روپے کردی۔ ڈاکٹر ظہور الحق نے کہا کہ موجودہ پرو وائس چانسلر کو انکوائری کر کے ملوث افراد کے خلاف کارروائی کرنی چاہیے۔