ڈی آئی خان: سیکیورٹی فورسز کا سرچ اینڈ سٹرائیک آپریشن، طالبان گورنر سمیت 9 دہشت گرد ہلاک

سیکیورٹی فورسز نے ڈیرہ اسماعیل خان کی تحصیل کلاچی کے علاقے جہان خانی میں دہشت گردوں کے خلاف سرچ اینڈ سٹرائیک آپریشن کیا، جس کے دوران طالبان گورنر سمیت 9 دہشت گرد ہلاک ہو گئے۔

سیکیورٹی ذرائع کے مطابق، یہ آپریشن دہشت گردوں کی سرگرمیوں کے بارے میں موصول خفیہ اطلاعات کی بنیاد پر کیا گیا تھا۔ فورسز نے دہشت گردوں کے ٹھکانے پر چھاپہ مارا، جس کے نتیجے میں شدید فائرنگ کا تبادلہ ہوا۔ فائرنگ کے دوران 9 دہشت گرد ہلاک ہو گئے، جبکہ سیکیورٹی فورسز کے کسی اہلکار کو کوئی جانی نقصان نہیں پہنچا۔

ابتدائی معلومات کے مطابق، ہلاک ہونے والے دہشت گرد حالیہ عرصے میں سیکیورٹی فورسز اور عام شہریوں کے خلاف متعدد حملوں میں ملوث تھے۔ آپریشن کے دوران دہشت گردوں کے ہتھیار اور دیگر ساز و سامان بھی برآمد کیا گیا۔