اپر کرم: نامعلوم سمت سے فائرنگ؛ دو شہری زخمی، قبائل میں مبینہ طور پر فائرنگ کا تبادلہ پھر سے شروع
زرائع کے مطابق تمام زخمیوں کو ڈسٹرکٹ ہیڈکوارٹر ہسپتال منتقل کیا گیا جہاں وہ زیرعلاج ہیں۔ زخمیوں میں ایک خاتون کی حالت نازک ہے۔
ضلع کرم: اپر کرم کے علاقے بوشہرہ میں مبینہ طور پر نامعلوم سمت سے فائرنگ کی وجہ سے دو شہری زخمی ہو گئے، زخمیوں کو ہسپتال لے جانے والی گاڑی حادثے کا شکار ہو گئی جس کے نتیجے میں مزید چھ افراد زخمی ہو گئے۔
فائرنگ سے زخمی ہونے والے عباس علی اور گل علی نے پولیس کو رپورٹ درج کراتے ہوئے بتایا کہ وہ دھوپ سینک رہے تھے کہ اچانگ ان پر فائرنگ کی گئی۔ اس واقعہ کے بعد مبینہ طور پر قبائل کے درمیان فائرنگ کا تبادلہ شروع ہوا۔
عباس علی اور گل علی کو زخمی حالت میں ہسپتال منتقل کیا جا رہا تھا جب ان کی گاڑی دوسری گاڑی سے ٹکرا گئی۔ اس ٹکراؤ کے نتیجے میں مزید چھ افراد زخمی ہوئے۔
زرائع کے مطابق تمام زخمیوں کو ڈسٹرکٹ ہیڈکوارٹر ہسپتال منتقل کیا گیا جہاں وہ زیرعلاج ہیں۔ زخمیوں میں ایک خاتون کی حالت نازک ہے۔
اس حوالے سے کرم پولیس کا کہنا تھا کہ واقعے کی تحقیقات کی جا رہی ہیں، اور ملوث عناصر کو قانون کے کٹہرے میں لاکھڑا کیا جائے گا۔
یہ بھی پڑھیں: بھارت کے مہا کمبھ میلے سے وائرل مونا لیزا کی بالی ووڈ میں انٹری
قبائلی رہنماء حاجی عابد نے بار بار امن معاہدے کی خلاف ورزی کو افسوسناک قرار دیتے ہوئے حکومت سے مطالبہ کیا کہ چودہ بار امن معاہدے کی خلاف ورزی کا نوٹس لیا جائے، جبکہ عوام قیام امن میں اپنا کردار ادا کریں۔
خیال رہے کہ یکم جنوری کو قبائل کے درمیان امن معاہدہ طے پایا تھا جس کے تحت فریقین کے بنکرز اور مورچوں کو مسمار کیا جائے گا، بڑا اسلحہ حکومت کے پاس جمع کرایا جائے گا، اور حکومت فریقین کے نقصانات کا ازالہ کرے گی، جبکہ مکمل قیامِ امن کے بعد پشاور پاراچنار شاہراہ کو کھولا جائے گا۔
