عبد الستار
مردان کی تحصیل تخت بھائی کے علاقہ جلالہ برے شاہ میں نامعلوم وجوہات کی بناء پر عبداللہ نامی شخص نے فائرنگ کرکے اپنی بیوی کو موت کے گھاٹ اتاردیا جبکہ بعدازاں خود پرپستول سے فائرنگ کرکے اپنی زندگی کا بھی خاتمہ کردیا۔
مقامی ذرائع کے مطابق مقتول عبداللہ کا تعلق سیاسی خاندان سے تھا اور مسلم لیگ کے سابقہ امیدوار پی کے 55 خورشید عالم کا بیٹا تھا۔
پولیس تھانہ شیرگڑھ کے مطابق تھانہ شیرگڑھ کی حدود جلالہ برے شاہ میں عبداللہ ولد خورشید عالم نے نامعلوم وجوہات کی بناء پراپنے گھر کے اندر پہلے اپنی بیوی پر فائرنگ کرکے اسے قتل کردیا جبکہ بعد میں پستول اپنی کن پٹی پر رکھ کر اپنی زندگی کا چراغ بھی گل کر دیا۔
واقعے کی اطلاع ملتے ہی ریسکیو 1122 کی ایمبولینس اور میڈیکل ٹیم جائے وقوعہ پر پہنچ گئی اور مقتولین کی لاشوں کو پوسٹ مارٹم کے لئے تحصیل ہیڈ کوارٹرہسپتال تخت بھائی منتقل کر دیا۔
پولیس کے ابتدائی معلومات کے مطابق مقتول چوبیس سالہ عبداللہ کا ذہنی توازن درست نہیں تھا جبکہ شیرگڑھ پولیس نے مقدمہ درج کرکے کیس کی باریک بینی سے تفتیش شروع کردی ہے۔
