شمالی وزیرستان عیدک کے مقام پر پولیس گاڑی پر فائرنگ کے نتیجے میں ایک راہگیر جاں بحق اور 4 اہلکار زخمی ہوگئے۔
سرکاری ذرائع کا کہنا ہے کہ رات 9 بجے کے قریب نامعلوم افراد نے پولیس گاڑی پر فائرنگ کی جس کے نتیجے میں ایک راہگیر جان بحق جبکہ 4 اہلکار زخمی ہوگئے۔
سرکاری حکام کے مطابق پولیس اہلکار کار میں سوار تھے جن پر تحصیل میرعلی کے علاقے عیدک میں فائرنگ کی گئی۔
پولیس کا کہنا تھا کہ زخمی اہلکاروں میں امجد علی ، فرمان علی ، افراسیاب اور نظیر خان شامل ہیں۔
فائرنگ کے نتیجے میں ایک شخص جان بحق بھی ہوا جس کا نام مولانا مکتوم ہے اور اس کا تعلق گاؤں زیرکی سے ہے۔
ریسکیو 1122 شمالی وزیرستان نے زخمی پولیس اہلکاروں کو ٹی ایچ کیو میرعلی ہسپتال منتقل کر دیا۔
پولیس نے جائے وقوعہ پر پہنچ کر شواہد اکٹھے کرکے واقعہ کی تحقیقات اور ملزمان کی تلاش شروع کردی۔
