سیدہ قرۃ العین
چیا سیڈز ایک جدید غذا یا قدیم شفا ہے۔ دنیا بھر میں صحت کے متوالے لوگ آج کل قدرتی اور غذائیت سے بھرپور اجزاء کی تلاش میں ہیں۔ اسی رجحان نے چیا سیڈز (Chia Seeds) کو شہرت کی بلندیوں پر پہنچا دیا ہے۔ اردو میں اسے عام طور پر تخمِ دودھی کہا جاتا ہے۔ یہ بیج دیکھنے میں چھوٹے سے سیاہ یا خاکستری رنگ کے ہوتے ہیں، لیکن ان میں غذائیت کا خزانہ پوشیدہ ہوتا ہے۔
تخمِ دودھی کیا ہے ؟
چیا سیڈز "Salvia hispanica” نامی پودے کے بیج ہیں جو خاص طور پر میکسیکو اور جنوبی امریکہ میں پائے جاتے ہیں۔ یہ قدیم مایا اور ایزٹک تہذیبوں میں بطور طاقتور غذا استعمال ہوتے تھے۔ آج بھی یہ بیج دنیا بھر میں سپر فوڈ کے طور پر جانے جاتے ہیں۔
تخمِ دودھی کے فوائد
وزن میں کمی میں مددگار
چیا سیڈز پانی میں بھیگنے کے بعد جیل جیسا مادہ بنا لیتے ہیں جو معدے میں دیر تک موجود رہتا ہے، جس سے بھوک کم لگتی ہے۔ اس لیے یہ وزن کم کرنے کے خواہشمند افراد کے لیے نہایت مفید سمجھے جاتے ہیں۔
دل کی صحت کے لیے فائدہ مند
ان میں اومیگا 3 فیٹی ایسڈز پائے جاتے ہیں جو کولیسٹرول کو کم کرنے اور دل کو صحت مند رکھنے میں مدد دیتے ہیں۔ذیابیطس کے مریضوں کے لیے بہترین ہے۔
شوگر لیول پر اثرات
چیا سیڈز خون میں شوگر لیول کو متوازن رکھنے میں مددگار ہوتے ہیں ان کا جیل جیسا مادہ شوگر کے جذب ہونے کے عمل کو سست کر دیتا ہے۔
اینٹی آکسیڈنٹس کا خزانہ ہے
ان میں موجود اینٹی آکسیڈنٹس جسم کو فری ریڈیکلز سے بچاتے ہیں، جو بڑھاپے اور بیماریوں کا سبب بنتے ہیں فائبر سے بھرپور ہوتے ہیں ۔
نظامِ انہضام کی درستگی
28 گرام چیا سیڈز میں تقریباً 11 گرام فائبر ہوتا ہے، جو نظامِ انہضام کو درست رکھتا ہے اور قبض جیسے مسائل سے نجات دیتا ہے۔
کیلشیم، آئرن اور میگنیشیم کا ذریعہ
یہ بیج ہڈیوں کی مضبوطی، خون کی روانی اور پٹھوں کے افعال کے لیے نہایت مفید ہیں۔ ان میں پروٹین کی مقدار بہت زیادہ ہے ۔ چیا سیڈز میں اعلیٰ معیار کا پودوں سے حاصل کردہ پروٹین بھی موجود ہوتا ہے، جو خاص طور پر ویجیٹیرین افراد کے لیے مفید ہے۔
جہاں فائدے ہیں وہیں کچھ نقصان بھی ہیں لیکن کوئی سنگین نقصان نہیں ہیں۔ تخمِ دودھی کے متواتر استعمال سے گیس یا پھولاؤ، چونکہ یہ بیج فائبر سے بھرپور ہوتے ہیں، اس لیے حد سے زیادہ استعمال سے معدے میں گیس یا اپھارہ ہو سکتا ہے۔
پانی کے بغیر کھانے سے دشواری
اگر انہیں پانی کے بغیر کھایا جائے تو یہ گلے میں پھنس سکتے ہیں یا نگلنے میں مسئلہ پیدا کر سکتے ہیں، کیونکہ یہ پھول جاتے ہیں اس لیے پانی میں بھگو کر استعمال کریں۔
اسکے علاوہ خون پتلا کرنے والی دواؤں کے ساتھ استعمال میں احتیاط کرے کیونکہ چیا سیڈز خون کو پتلا کرنے کی صلاحیت رکھتے ہیں، اس لیے اگر آپ ایسی دواؤں پر ہیں تو پہلے ڈاکٹر سے مشورہ ضرور کریں۔
(تخمِ دودھی) بمقابلہ( تخمِ ملنگا)
اکثر لوگ چیا سیڈز اور تخمِ ملنگا (Basil Seeds) کو ایک ہی چیز سمجھتے ہیں، حالانکہ یہ دونوں الگ الگ پودوں سے حاصل ہونے والے بیج ہیں۔
تخمِ ملنگا کے فوائد
- جسم کو ٹھنڈک فراہم کرتا ہے، خاص طور پر گرمیوں میں۔
- معدے کی تیزابیت، سینے کی جلن، اور گرمی دانوں میں مفید۔
- آسانی سے ہضم ہو جاتا ہے اور جلد اثر دکھاتا ہے۔
- بچوں اور بزرگوں کے لیے بھی محفوظ اور ہلکی غذا۔
- چیا سیڈز کا استعمال کیسے کیا جائے؟
- انہیں پانی، دودھ یا جوس میں بھگو کر پیا جا سکتا ہے۔
- دہی، اسمودیز یا دلیے میں شامل کیا جا سکتا ہے۔
- انہیں صحت بخش اسنیکس، چاکلیٹس اور بسکٹ میں بھی شامل کیا جاتا ہے۔
- روزانہ 1-2 چمچ مناسب مقدار سمجھی جاتی ہے۔
- وقت کی کوئی قید نہیں صبح یا شام کسی بھی وقت لیا جا سکتا ہے۔
- رات کو بھگو کر رکھ دیں صبح استعمال کریں ۔
چیا سیڈز یعنی تخمِ دودھی نہ صرف غذائیت سے بھرپور ہیں بلکہ صحت مند طرزِ زندگی کی طرف ایک بہترین قدم بھی ہیں۔ تاہم کسی بھی غذا کا زیادہ استعمال نقصان دہ ہو سکتا ہے، اس لیے اعتدال میں رہ کر ہی ان کا استعمال کریں۔ اگر آپ قدرتی طاقت دل کی صحت، بہتر انہضام اور وزن میں کمی چاہتے ہیں تو چیا سیڈز کو اپنی روزمرہ خوراک میں شامل کرنا ایک دانشمندانہ فیصلہ ہوگا۔
دوسری جانب، تخمِ ملنگا بھی اپنی جگہ کم قیمت اور فوری فائدے والا بیج ہے، خاص طور پر گرم موسم میں۔ دونوں بیج اپنے اپنے فوائد رکھتے ہیں، اور آپ اپنی صحت کی ضروریات کے مطابق انہیں اپنی خوراک میں شامل کر سکتے ہیں۔
آجکل کے جدید تقاضوں کو ملحوظ خاطر رکھتے ہوئے اگر کوئی چیز آپ کو آرام سے بازار میں نہیں ملتی تو اگر آپ اپنی خوراک کا صحیح استعمال روزمرہ میں کریں تو یہ ضروری نہیں کے آپ چیا سیڈز ضرور استعمال کریں اسکی جگہ تخم ملنگا بھی استعمال کیا جا سکتا ہے بے شک دونوں میں کافی فرق ہے لیکن دونوں اپنی جگہ مفید ہیں
