سیدہ قرۃ العین
دنیا بھر میں خوبصورتی کے رجحانات تیزی سے بدلتے جا رہے ہیں۔ صارفین اب قدرتی اور محفوظ اجزاء کی جانب راغب ہو رہے ہیں، کیونکہ کیمیکل سے بھرپور بیوٹی پراڈکٹس نہ صرف جلد کو وقتی فائدہ دیتی ہیں بلکہ طویل مدت میں مضر اثرات بھی چھوڑ سکتی ہیں۔ یہی وجہ ہے کہ سکن کیئر انڈسٹری میں قدرتی عناصر کی مانگ میں بے پناہ اضافہ ہوا ہے۔ انہی عناصر میں ایک شاندار اور حیرت انگیز اضافہ "سنیل سلائم” (Snail Slime) ہے، جو "سنیل ہارویسٹنگ” کے ذریعے حاصل کیا جاتا ہے۔
سنیل ہارویسٹنگ آخر ہے کیا؟
سنیل ہارویسٹنگ دراصل گھونگھوں کی افزائش، نگہداشت اور ان سے قدرتی چپچپے مادے یعنی "سلائم” کے حصول کا ایک مخصوص عمل ہے۔ یہ سلائم وہ قدرتی رطوبت ہے جو گھونگھے اپنے جسم کو حرکت دیتے وقت خارج کرتے ہیں۔ سائنسی تحقیق کے مطابق اس میں قدرتی طور پر موجود ایسے اجزاء پائے جاتے ہیں جو جلد کو نمی فراہم کرنے، مرمت کرنے، جھریاں کم کرنے، اور جلدی بیماریوں کے خلاف مزاحمت میں مددگار ثابت ہوتے ہیں۔
سنیل سلائم بہت کیسے حاصل کیا جاتا ہے
سنیل سلائم حاصل کرنے کے لیے عموماً دو اقسام کے گھونگھوں کو استعمال کیا جاتا ہے: Helix aspersa (جسے garden snail بھی کہا جاتا ہے) اور Achatina fulica (افریقی giant snail)۔ ان گھونگھوں کو ایک کنٹرولڈ ماحول میں پالا جاتا ہے جہاں درجہ حرارت نمی اور خوراک پر مکمل نظر رکھی جاتی ہے۔ سلائم حاصل کرنے کے لیے جدید اور محفوظ طریقے استعمال کئے جاتے ہیں تاکہ گھونگھوں کو کوئی نقصان نہ پہنچے۔ سلائم حاصل کرنے کے بعد اسے فلٹر، صاف، اور محفوظ طریقے سے پروسیس کیا جاتا ہے تاکہ یہ معیار کے مطابق بیوٹی پراڈکٹس میں شامل کیا جا سکے۔
اینٹی ایجنگ خصوصیات سے مالامال
سنیل سلائم میں Glycolic Acid، Hyaluronic Acid، اور دیگر قدرتی پروٹینز موجود ہوتے ہیں جو جلد کی لچک کو بہتر بناتے ہیں اور جھریوں کو کم کرتے ہیں۔ زخموں کی مرمت کا انوکھا عمل جو کہ یہ سلائم جلد پر موجود دانے، زخم یا چھالوں کی قدرتی طور پر مرمت کرتا ہے، جس سے جلد کی ساخت بہتر ہوتی ہے
کیل مہاسوں کا خاتمہ بھی اس میں شامل ہے
اس میں موجود antimicrobial خصوصیات جلد کو بیکٹیریا سے محفوظ رکھتی ہیں اور کیل مہاسے جیسے مسائل سے نجات دلاتی ہیں۔
جلد کو قدرتی نمی فراہم کرتا ہے
سنیل سلائم قدرتی طور پر جلد کی نمی کو برقرار رکھتا ہے، جس کی وجہ سے یہ خشک جلد کے لیے نہایت مفید سمجھا جاتا ہے۔ جلد اور چہرے کی چمک میں اضافہ کرتا ہے۔ سنیل سلائم جلد کو ایک قدرتی نرمی اور چمک عطا کرتا ہے، جو اسے ایک جوان لک دیتا ہے۔
بین الاقوامی مارکیٹ میں اسکی مانگ
کوریا، جاپان، چین، تھائی لینڈ اور یورپی ممالک میں سنیل سلائم بیسڈ پراڈکٹس کی مانگ مسلسل بڑھ رہی ہے۔ معروف برانڈز جیسے Mizon، COSRX، اور It’s Skin اس کو اپنی پراڈکٹس میں بھرپور طریقے سے استعمال کر رہے ہیں۔ ان ممالک میں نہ صرف یہ ایک مضبوط انڈسٹری بن چکی ہے بلکہ اربوں ڈالر کا کاروبار بھی ہو رہا ہے۔
کیا پاکستان میں سنیل ہارویسٹنگ کے امکانات ہیں ؟
پاکستان میں اگرچہ یہ صنعت ابھی نئی ہے، لیکن یہاں کی موسمی صورتحال اور قدرتی وسائل اسے ایک کامیاب کاروبار بنانے کی صلاحیت رکھتے ہیں۔ چھوٹے کسان یا نئے کاروباری افراد سنیل فارمینگ سے آغاز کر کے سنیل سلائم کی پیداوار کی طرف جا سکتے ہیں۔ سنیل فارمنگ کے لیے بہت زیادہ زمین درکار نہیں ہوتی، اور ان کی خوراک جیسے پتے، سبزیاں یا نامیاتی فضلہ آسانی سے دستیاب ہوتا ہے۔
روزگار اور برآمدات کا نیا موقع
اگر حکومت یا نجی شعبہ اس شعبے کو فروغ دے، تو یہ نہ صرف مقامی سطح پر روزگار کے مواقع پیدا کرے گا بلکہ برآمدات کے ذریعے قیمتی زرمبادلہ بھی حاصل کیا جا سکتا ہے۔ یہ ان نوجوانوں کے لیے بہترین آپشن ہے جو کم سرمایہ کاری کے ساتھ کوئی نیا کاروبار شروع کرنا چاہتے ہیں۔
کچھ احتیاطی تدابیر
اگرچہ سنیل ہارویسٹنگ ایک نفع بخش صنعت ہے، لیکن اس میں چند اہم نکات کا خیال رکھنا نہایت ضروری ہے۔
- سنیل فارم کی صفائی اور ہوا کی روانی کا خاص خیال رکھا جائے۔
- سلائم اکٹھا کرنے کے لیے ہائجینک طریقے استعمال کئے جائیں۔
- سنیل سلائم کو مناسب طریقے سے فلٹر اور محفوظ کیا جائے۔
- کسی بھی پروڈکٹ کو مارکیٹ میں لانے سے پہلے اسے لیبارٹری سے ٹیسٹ کروایا جائے۔
- اس معاملے میں نئی ریسرچ اور ٹیکنالوجی بہت اہم کردار ادا کرتی ہیں۔
پاکستان میں اگر سنیل ہارویسٹنگ کو سائنسی بنیادوں پر فروغ دیا جائے، تو یہ ایک مربوط اور جدید انڈسٹری کی صورت اختیار کر سکتی ہے۔ یونیورسٹیز اور زرعی ادارے اگر سنیل بریڈنگ، فیڈ، اور پروسیسنگ پر تحقیق کریں تو یہ معیار اور پیداوار دونوں میں بہتری لا سکتا ہے۔
سنیل ہارویسٹنگ ایک جدید، ماحول دوست اور قدرتی طریقہ ہے جو خوبصورتی کی دنیا میں ایک انقلابی تبدیلی لا رہا ہے۔ یہ نہ صرف بیوٹی انڈسٹری کے لیے قیمتی خزانہ ہے بلکہ پاکستان جیسے ترقی پذیر ملک کے لیے ایک سنہرا موقع بھی ہے۔ اگر اسے سمجھداری سے اپنایا جائے، تو یہ نہ صرف معیشت کو تقویت دے سکتا ہے بلکہ ہزاروں افراد کے لیے باعزت روزگار کا ذریعہ بھی بن سکتا ہے۔
اور ہم جس ترقی پزیر ملک میں رہتے ہیں جہاں وسائل سے زیادہ مسائل ہیں جہان عام انسان دو وقت کی روٹی کے لیے پریشان رہتا ہے تو اس طرح کے کاروبار جو کہ جگہ اور وسائل کم لیتے ہو ان کے لیے ایک مفید اور منافع بخش کاروبار ہے۔
