پشاور: مسجد کے باہر دھماکے میں مفتی منیر شاکر جاں بحق
دھماکے کے بعد قانون نافذ کرنے والے ادارے علاقے میں تحقیقات کر رہے ہیں، جبکہ دھماکے کی نوعیت اور اسباب جاننے کے لیے تفتیش کی جا رہی ہے۔
معروف عالم دین مفتی منیر شاکر بارودی مواد کے دھماکے میں جاں بحق، جبکہ دیگر تین افراد زخمی ہو گئے۔
پولیس کے مطابق تھانہ ارمڑ کی حدود میں واقع مسجد کے باہر بارودی مواد کا دھماکہ ہوا جس میں چار افراد زخمی ہو گئے۔ زخمیوں میں عالم دین مفتی منیر شاکر بھی شامل تھے جو بعد میں زخموں کی تاب نہ لاتے ہوئے جاں بحق ہو گئے۔ مفتی منیر شاکر کا بایاں پاؤں متاثر ہوا تھا۔
دھماکے کے بعد پولیس، بم ڈسپوزل یونٹ (بی ڈی یو) اور کاؤنٹر ٹیررازم ڈیپارٹمنٹ (سی ٹی ڈی) کے افسران جائے وقوعہ پہنچ گئے اور شواہد اکٹھے کرنا شروع کر دیئے۔
پولیس کے مطابق دیگر زخمیوں میں خوشحال، عابد اور سید نبی شامل ہیں۔ تمام زخمیوں کو ابتدائی طبی امداد کے لیے لیڈی ریڈنگ ہسپتال (ایل آر ایچ) منتقل کر دیا گیا۔
یہ بھی پڑھیں: معمولی اختلاف پر قتل، کیا کسی انسان کی جان لینا اتنا ہی آسان ہے؟
مشیر صحت خیبر پختونخوا احتشام علی نے مفتی منیر شاکر کی شہادت پر رنج و غم کا اظہار کرتے ہوئے اسے ایک ناقابل تلافی نقصان قرار دیا اور کہا کہ مفتی منیر شاکر کی شہادت کی خبر سن کر دلی صدمہ پہنچا۔
انہوں نے کہا کہ مفتی منیر شاکر کو زخمی حالت میں ابتدائی طبی امداد کے لیے لیڈی ریڈنگ ہسپتال منتقل کیا گیا تاہم وہ زخموں کی تاب نہ لاتے ہوئے شہادت کے درجے پر فائز ہو گئے۔
دھماکے کے بعد قانون نافذ کرنے والے ادارے علاقے میں تحقیقات کر رہے ہیں، جبکہ دھماکے کی نوعیت اور اسباب جاننے کے لیے تفتیش کی جا رہی ہے۔
