ملاکنڈ: موسیٰ مینہ لیویز پوسٹ میں فائرنگ، دو اہلکار جانبحق، ایک زخمی

ملاکنڈ درگئی کی موسیٰ مینہ لیویز پوسٹ میں فائرنگ کے نتیجے میں دو لیویز اہلکار جانبحق اور ایک زخمی ہو گیا۔ ذرائع کے مطابق، فائرنگ مبینہ طور پر لیویز اہلکار نے کی، جس کا کچھ روز قبل اس پوسٹ سے تبادلہ ہوا تھا۔

فائرنگ کے نتیجے میں حوالدار فضل کریم اور سپاہی ریاض موقع پر جانبحق ہوگئے جبکہ سپاہی عالم زیب زخمی ہو گیا۔

واقعے کے بعد مقتول اہلکاروں کے ورثا نے درگئی مین چوک پر احتجاج کرتے ہوئے شاہراہ کو ٹریفک کے لئے بند کر دیا اور ملزم کی فوری گرفتاری کا مطالبہ کیا ہے۔

احتجاج کی وجہ سے علاقے میں آمد و رفت شدید متاثر ہو رہی ہے، اور ورثا کا کہنا ہے کہ جب تک ملزم گرفتار نہیں ہوتا، ان کا احتجاج جاری رہے گا۔