پاکستان تحریک انصاف (پی ٹی آئی) کے چیئرمین عمران خان کی نااہلی کا فیصلہ آنے کے بعد کارکنان نے پشاور سمیت ملک بھر میں احتجاج شروع کر دیا۔
توشہ خانہ کیس میں چیئرمین پی ٹی آئی عمران خان کی نااہلی کا فیصلہ آنے کے بعد پارٹی کارکنان گھروں سے باہر نکل آئے اور ملک بھر میں جگہ جگہ احتجاج کا سلسلہ شروع ہو گیا۔
پشاور میں رنگ روڈ، حیات آباد، کبوتر چوک رنگ روڈ، چارسدہ روڈ جنکشن، نشتر آباد، سٹیڈیئم چوک صدر، کوہاٹی چوک، چونگے چوک اور باقی جگہوں پر بھی کارکنان نے سڑکوں کو بلاک کردیا ہے اور احتجاج کررہے ہیں۔
کرک میں بھی پی ٹی آئی ورکروں نے تنگوڑی چوک میں انڈس ہائی وے کو بند کردیا، کارکنا نے کرک روڈ پر ٹائر جلاکر روڈ بلاک کردیا، پشاور تا کراچی شاہرہ انڈس ہائی وے بندش سے گاڑیوں کی لمبی قطاریں لگ گئی۔
فیصلہ آنے کے فوری بعد الیکشن کمیشن آفس کے باہر پی ٹی آئی کارکنان نے جمع ہو کر احتجاج کیا جہاں پر پولیس نے گرفتاریاں بھی کیں۔ راولپنڈی کے علاقے فیض آباد میں بھی پی ٹی آئی کے کارکنان جمع ہوئے اور مری روڈ بلاک کر دی۔ کارکنان نے الیکشن کمیشن کے فیصلے کے خلاف احتجاج کیا۔
فیض آباد میں مظاہرین کو منشتر کرنے کے لیے پولیس کی جانب سے شیلنگ کی گئی۔ اسلام آباد کے علاقے بھارہ کہو میں بھی پی ٹی آئی کارکنان نے احتجاج کیا اور سڑک ٹریفک کے لیے بند کر دی۔
لاہور، رحیم یار خان سمیت متعدد شہروں میں پی ٹی آئی کے مشتعل کارکنان سڑکوں پر نکل آئے، مشتعل افراد نے الیکشن کمیشن اور مسلم لیگ ن کے خلاف احتجاج کیا۔
گجرات میں جی ٹی روڈ کو چار مقامات پر بند کر دیا گیا۔ شاہین چوک، لالہ موسیٰ، کھاریاں اور سرائے عالمگیر جی ٹی روڈ کو بند کر کے احتجاج کیا جا رہا ہے۔ مختلف شاہراہوں پر ٹائر بھی جلائے گئے۔
