جیتی بازی ہار گئے ہم، گرین شرٹس کیویز کیخلاف اپنے پہلے ٹیسٹ میں ناکام

متحدہ عرب امارات میں جاری تین میچز پر مشتمل ٹیسٹ سیریز کے پہلے میچ میں نیوزی لینڈ نے پاکستان کو 4 رنز سے شکست دیدی۔

ابوظہبی کے شیخ زید سٹیڈیم میں کھیلے گئے ٹیسٹ کے چوتھے روز پاکستانی ٹیم نے بغیر کسی نقصان کے 37 رنز سے اپنی نامکمل اننگز کا آغاز کیا تو دونوں اوپننگ بلے باز امام الحق اور محمد حفیظ اپنے اپنے سکور میں صرف 2،2 رنز کا اضافہ ہی کر سکے۔

امام الحق 27 جبکہ محمد حفیظ 10 رنز پر آؤٹ ہوئے جس کے بعد آنے والے بلے باز حارث سہیل بھی صرف 4 رنز کے مہمان ثابت ہوئے۔

قومی ٹیم کی 3 وکٹیں 48 رنز پر گرنے کے بعد اسد شفیق اور اظہر علی نے ذمہ دارانہ کھیل کا مظاہرہ کرتے ہوئے 82 رنز کی شراکت قائم کی تاہم اسدشفیق کے 45 رنز پر آؤٹ ہونے کے بعد پاکستانی بیٹنگ ایک بار پھر مشکلات کا شکار ہوگئی۔

نئے آنے والے بلے بازوں میں بابراعظم 13، کپتان سرفراز احمد 3 جب کہ بلال آصف، یاسر شاہ اور حسن علی کھاتہ کھولے بغیر ہی پویلین واپس لوٹ گئے۔

دوسری جانب اظہر علی آخری لمحات تک وکٹ پر موجود رہنے کے باوجود ٹیم کو فتح سے ہمکنار نہ کرواسکے اور آخر میں خود بھی 65 رنز کی اننگز کھیل کر آؤٹ ہوگئے اور یوں 176 کے تعاقب میں قومی ٹیم صرف 171 رنز ہی بنا پائی۔

اس سے قبل نیوزی لینڈ کی پوری ٹیم دوسری اننگز میں 249 رنز بنا کر آؤٹ ہوگئی تھی جبکہ قومی ٹیم کو پہلی اننگز میں 74 رنز کی برتری کی بدولت جیت کے لیے 176 رنز کا ہدف ملا۔

نیوزی لینڈ کی جانب سے واٹلنگ 59 ، نکولس 55 اور رووال 46 رنز کے ساتھ نمایاں رہے جب کہ حسن علی اور یاسر شاہ کے حصے میں 5،5 وکٹیں آئیں۔

قبل ازیں پہلی اننگز میں قومی بولرز کی شاندار بولنگ کی بدولت نیوزی لینڈ کی پوری ٹیم صرف 153 رنز پر آؤٹ ہوئی تاہم پاکستانی ٹیم اس کا بھرپور فائدہ نہیں اٹھاسکی اور 227 رنز پر پوری ٹیم پویلین لوٹ گئی۔

واضح رہے کہ اس سے قبل قومی کرکٹ ٹیم نے نیوزی لینڈ کے خلاف ٹی ٹوئنٹی میچز کی سیریز میں 0-3 سے فتح حاصل کی تھی جب کہ ون ڈے سیریز بارش کی وجہ سے 1-1 سے برابر رہی۔