پہلا ٹیسٹ، نیوزی لینڈ کے 153 رنز کے جواب میں پاکستان کے 59 رنز، 2 کھلاڑی آؤٹ
پہلے دن کے اختتام پر حارث سہیل اور اظہر علی کریز پر موجود تھے اور دونوں نے بالترتیب 22 اور 10 رنز بنائے تھے۔
متحدہ عرب امارات میں پاکستان اور نیوزی لینڈ کے درمیان جاری تین میچز پر مبنی ٹیسٹ سیریز کے پہلے میچ میں نیوزی لینڈ کی پوری ٹیم اپنی پہلی اننگز میں صرف 153 رنز پر آؤٹ ہوگئی جبکہ پہلے دن کے اختتام تک پاکستان نے دو کھلاڑیوں کے نقصان پر 59 رنز بنائے ہیں۔
پہلے ٹیسٹ میچ میں نیوزی لینڈ نے پاکستان کے خلاف ٹاس جیت کر بیٹنگ کا فیصلہ کیا تو کیویز کی جانب سے اننگز کا آغاز جیت راول اور ٹام لیتھم نے کیا تاہم 35 رنز کے مجموعی سکور پر دونوں اوپنرز آؤٹ ہوگئے۔
اس کے بعد راس ٹیلر بھی 2 رنز بناکر یاسر شاہ کی گیند پر وکٹ کے پیچھے سرفراز کے ہاتھوں کیچ آؤٹ ہوئے۔
نیوزی لینڈ کی جانب سے کپتان کین ولیم سن ہی پاکستانی باؤلرز کے آگے ڈٹے رہے اور 63 رنز بناکر آؤٹ ہوئے تاہم اس کے بعد نیوزی لینڈ کا مڈل آرڈر زیادہ دیر تک وکٹ پر کھڑا نہ رہ سکا اور پوری ٹیم صرف 153 رنز بنا کر آؤٹ ہوگئی۔
پاکستان کی جانب سے محمد حفیظ اور امام الحق نے اننگز کا آغاز کیا اور پہلی وکٹ کی شراکت میں 27 رنز بنائے۔
پاکستان کے آؤٹ ہونے والے پہلے بلے باز امام الحق تھے وہ صرف چھ رنز بنا کر گرینڈ ہوم کی گیند پر ویلیم سن کے ہاتھوں کیچ آؤٹ ہوئے۔
27 رنز کے مجموعی سکور پر پاکستان کی دوسری وکٹ اس وقت گری جب محمد حفیظ 20 رنز بنا کر کیچ آؤٹ ہو گئے۔
پہلے دن کے اختتام پر حارث سہیل اور اظہر علی کریز پر موجود تھے اور دونوں نے بالترتیب 22 اور 10 رنز بنائے تھے۔
پاکستان کو نیوزی لینڈ کی برتری ختم کرنے کے لیے مزید 94 رنز کی ضرورت ہے جبکہ پہلی اننگز میں ابھی اس کی آٹھ وکٹیں باقی ہیں۔
خیال رہے کہ ابوظہبی ٹیسٹ کے لیے پاکستان کی ٹیم محمد حفیظ، امام الحق، اظہر علی، اسد شفیق,حارث سہیل، بابر اعظم، کپتان سرفراز احمد، یاسر شاہ، بلال آصف، محمد عباس اور حسن علی پر مشتمل ہے۔
رواں سال قومی ٹیم کی کارکردگی متاثرکن رہی جہاں گرین شرٹس نے آئرلینڈ کو واحد میچ میں شکست دی، انگلینڈ میں سیریز 1-1 سے برابر کی جب کہ یو اے ای میں آسٹریلیا پر 0-1 سے برتری حاصل کی۔
واضح رہے کہ اس سے قبل قومی کرکٹ ٹیم نے نیوزی لینڈ کے خلاف ٹی ٹوئنٹی میچز کی سیریز میں 0-3 سے فتح حاصل کی تھی جب کہ ون ڈے سیریز بارش کی وجہ سے 1-1 سے برابر رہی۔
