پروفیسر نے پشاور زلمی سے اپنی راہیں الگ کرلیں

نامور آل راؤنڈر محمد حفیظ عرف پروفیسر نے پاکستان سپر لیگ کی فرنچائز پشاور زلمی سے راہیں الگ کرنے کا فیصلہ کر لیا۔

سماجی رابطوں کی ویب سائٹ ٹوئٹر پر اپنے پیغام میں محمد حفیظ کا کہنا تھا کہ پشاور زلمی کے ساتھ تین سال بہت شاندار رہے اور وہ وہاں ملنے والی محبت بالکل نہیں بھول سکتے۔

حفیظ نے کہا کہ میں چئیرمین پشاور زلمی کا شکریہ ادا کرتا ہوں جنہوں نے بہت سپورٹ کیا تاہم اب اگلے ایڈیشن کیلئے میں دوبارہ ڈرافٹ میں جانا چاہتا ہوں۔

Thanks @PeshawarZalmi & @JAfridi10 for such a great journey of 3yrs full of fond memories. Had fabulous time with U all. Now I decided to go to Draft of @thePSLt20 , Thanks to all fans of @PeshawarZalmi for their unconditional love & support. wishing u all the best for future

— Mohammad Hafeez (@MHafeez22) November 8, 2018

انہوں نے کہا کہ میں پشاور زلمی کے تمام مداحوں کا شکریہ اداکرتا ہوں۔

خیال رہے کہ محمد حفیظ پاکستان سپر لیگ کے تینوں ایڈیشن میں پشاور زلمی کا حصہ رہے ہیں جس نے دوسرے ایڈیشن میں پی ایس ایل ٹائٹل اپنے نام کیا تھا جبکہ تیسرے ایڈیشن میں اسے فائنل میں اسلام آباد سے شکست ہوگئی تھی۔

یہ بھی خیال رہے کہ پاکستان سپر لیگ فور کیلئے کھلاڑیوں کی ڈرافٹنگ 20 نومبر کو اسلام آباد میں ہوگی جبکہ پی ایس ایل میں شامل متعدد کھلاڑیوں کے فرنچائزز کے ساتھ تین سالہ معاہدے بھی ختم ہورہے ہیں جس کے بعد چوتھے ایڈیشن میں بڑے پیمانے پر ردوبدل کا امکان ہے۔

قابل ذکر امر یہ ہے کہ پاکستان سپر لیگ کے چوتھے ایڈیشن کا آغاز اس بار متحدہ عرب امارات کے بجائے پاکستان سے ہوگا تاہم سیکیورٹی معاملات کی وجہ سے تمام میچز پاکستان میں کرانے کی تجویز پر اتفاق نہیں ہوسکا ہے۔

ذرائع کے مطابق کراچی، لاہور اور پنڈی میں میچز ہوں گے، ملتان سٹیڈیم انٹرنیشنل معیار کے مطابق ہے لیکن فائیو سٹار ہوٹل نہ ہونے کی وجہ سے اس بار ملتان میں پی ایس ایل میچ نہ کرانے کی تجویز دی گئی ہے۔