کینگروز کے بعد شاہین کیویز پر جھپٹنے کو تیار، ٹی ٹوئنٹی سیریز کا پہلا میچ کل ہوگا

نیوزی لینڈ کیخلاف تین میچز پر مبنی ٹی ٹوئنٹی سیریز کیلئے 15 رکنی قومی سکواڈ کا اعلان کر دیا گیا۔

کیویز کیخلاف سیریز میں قومی ٹیم کی قیادت سرفراز احمد کریں گے جبکہ دیگر کھلاڑیوں میں فخر زمان، محمد حفیظ، صاحبزادہ فرحان، بابراعظم، شعیب ملک، آصف علی، حسین طلعت، شاداب خان، شاہین شاہ آفریدی، عثمان خان شنواری، فہیم اشرف، حسن علی، عماد وسیم اور وقاص مقصود شامل ہیں۔

پاکستان اور نیوزی لینڈ کے درمیان پہلا ٹی 20 میچ 31 اکتوبر کو ابوظہبی میں پاکستانی وقت کے مطابق رات 9 بجے کھیلا جائے گا، دوسرا میچ 2 نومبر کو دبئی میں ہو گا جبکہ تیسرا اور آخری میچ 4 نومبر کو دبئی میں کھیلا جائے گا۔

علاوہ ازیں دونوں ٹیموں کے مابین 3 ایک روزہ میچز کے علاوہ تین میچز پر مبنی ٹیسٹ سیریز بھی کھیلی جائے گی۔

واضح رہے کہ اس سے قبل متحدہ عرب امارات میں ہی پاکستان نے آسٹریلیا کیخلاف دو میچز پر مبنی ٹیسٹ سیریز میں ایک صفر سے کامیابی حاصل کی جبکہ 3 میچز پر مشتمل ٹی ٹوئنٹی سیریز میں شاہینوں نے کینگروز کو وائٹ واش کر دیا تھا۔