دبئی کے شیر ابو ظہبی میں ڈھیر، دوسرے ٹیسٹ میچ میں گرین شرٹس مشکلات کے شکار

متحدہ عرب امارات میں جاری پاک آسٹریلیا ٹیسٹ سیریز کے دوسرے میچ میں قومی ٹیم کے 282 رنز کے جواب میں آسٹریلیا نے اپنی پہلی اننگز میں کھیل کے اختتام پر 2 وکٹوں کے نقصان پر 20 رنز بنا لیے۔

ابوظہبی کے شیخ زید سٹیڈیم میں کھیلے جارہے دوسرے ٹیسٹ میچ میں قومی ٹیم کے کپتان سرفراز احمد نے ٹاس جیت کر آسٹریلیا کے خلاف پہلے بیٹنگ کا فیصلہ کیا جو درست ثابت نہ ہوا۔

پاکستان کی جانب سے محمد حفیظ اور فخرزمان نے اننگز کا آغاز کیا تو حفیظ چوتھے ہی اوور میں مچل اسٹارک کا شکار بن گئے وہ صرف 4 رنز بناسکے۔

اس کے بعد اظہر علی بیٹنگ کے لیے آئے اور فخرزمان کے ساتھ ملکر 52 رنز کی شراکت قائم کی تاہم اس کے بعد آسٹریلین سپنر ناتھن لیون نے صرف 6 گیندوں پر 4 کھلاڑیوں کو پویلین بھیج کر پاکستانی بیٹنگ لائن کی کمر توڑ دی۔

اظہر علی 15 رنز پر ناتھن لیون کا شکار بنے جب کہ سپنر نے حارث سہیل، اسد شفیق اور بابر اعظم کو کھاتہ کھولنے کی مہلت ہی نہیں دی۔

کھانے سے وقفے سے قبل ہی آدھی ٹیم کے صرف 57 رنز پر پویلین لوٹ جانے کے بعد کپتان سرفراز خود بیٹنگ کے لیے آئے اور اوپننگ بلے باز فخرزمان کے ساتھ ملکر محتاط انداز میں بیٹنگ کرتے ہوئے ٹیم کا اسکور آگے بڑھایا۔

فخرزمان اور سرفراز احمد نے چھٹی وکٹ کے لیے 147 رنز کی قیمتی شراکت قائم کی اس دوران دونوں بلے بازوں نے اپنی نصف سنچریاں مکمل کیں۔

فخرزمان ڈیبیو ٹیسٹ میں ہی نروس نائینٹیز کا شکار ہوگئے اور صرف 6 رنز کی کمی سے سنچری مکمل نہ کرسکے جس کے بعد بلال آصف بیٹنگ کے لیے آئے اور 12 رنز کے مہمان ثابت ہوئے۔

بعد ازاں کپتان سرفراز احمد بھی 6 رنز کی کمی سے اپنی سنچری مکمل نہ کرسکے اور 94 رنز پر لیبسچگنی کا شکار بنے جب کہ یاسر شاہ 28 رنز بناکر پویلین واپس لوٹے۔

آسٹریلیا کی جانب سے ناتھن لیون نے 4، لیبسچگنی نے 3 ، مچل مارش اور مچل سٹارک نے ایک ایک وکٹ حاصل کی۔

آسٹریلیا نے پاکستان کی پہلی اننگز کے 282 رنز کے جواب میں بیٹنگ شروع کی تو محمد عباس کی نپی تلی بالنگ کے باعث کینگروز کے 2 کھلاڑی صرف 20 کے مجموعے پر پویلین لوٹ گئے۔

اوپنر عثمان خواجہ 3 اور نائٹ واچ مین پیٹر سڈل 4 رنز پر چلتے بنے جس کے بعد کھیل ختم کردیا گیا۔

پاکستان کی جانب سے دو کھلاڑیوں کو ٹیسٹ کیپ دی گئی ہے، پہلے میچ میں ان فٹ ہونے والے امام الحق کی جگہ فخر زمان کو ٹیسٹ کیپ دی گئی ہے جب کہ وہاب ریاض کی جگہ میر حمزہ کو ٹیسٹ ڈیبیو کا موقع دیا گیا۔

واضح رہے پہلے ٹیسٹ میں آسٹریلین بلے بازوں نے عمدہ بیٹنگ کے ذریعے میچ ڈرا کرکے پاکستان کو یقینی فتح سے محروم کردیا تھا۔