دبئی ٹیسٹ، قومی ٹیم آسٹریلیا کے خلاف پہلی اننگز میں 482 رنز بنا کر آؤٹ ہوگئی
آسٹریلیا کی جانب سے پیٹرسڈل نے 3، نیتھن لیون نے 2 جب کہ جون ہولاند، مارنس لیبسچگنی اور مچل اسٹارک نے ایک ایک وکٹ حاصل کی۔
دبئی ٹیسٹ میں قومی ٹیم آسٹریلیا کے خلاف پہلی اننگز میں 482 رنز بنا کر آؤٹ ہوگئی جب کہ دوسرے دن کھیل کے اختتام تک آسٹریلیا نے بغیر کسی نقصان کے 30 رنز بنائے۔
قومی ٹیم نے دوسرے دن کھیل کا آغاز 3 وکٹوں کے نقصان پر 255 رنز سے کیا تو صرف 5 رنز کے اضافے سے محمد عباس آؤٹ ہوگئے۔
اس کے بعد حارث سہیل اور اسد شفیق کے درمیان 150 رنز کی شراکت قائم ہوئی تاہم اسد شفیق بھی 80 رنز بناکر پویلین لوٹ گئے۔
بابراعظم 4 رنز بناکر رن آؤٹ ہوئے جب کہ حارث سہیل نے سنچری سکور کی اور 110 رنز بنانے کے بعد آؤٹ ہوئے۔
کپتان سرفراز احمد 15 رنز بنا کر رن آؤٹ ہوئے ، بلال آصف 12 اور یاسر شاہ 3 رنزبنا سکے۔
آسٹریلیا کی جانب سے پیٹرسڈل نے 3، نیتھن لیون نے 2 جب کہ جون ہولاند، مارنس لیبسچگنی اور مچل اسٹارک نے ایک ایک وکٹ حاصل کی۔
قبل ازیں ٹیسٹ میچ کے پہلے دن قومی ٹیم کے کپتان سرفراز احمد نے ٹاس جیت کر پہلے بیٹنگ کا فیصلہ تو پاکستان کی جانب سے اننگز کا آغاز محمد حفیظ اور امام الحق نے انتہائی پراعتماد انداز میں کیا اور دونوں اوپنرز نے 205 رنز کی شراکت قائم کی۔
205 رنز کے مجموعی سکور پر امام الحق 76 رنز بناکر آؤٹ ہوگئے تاہم محمد حفیظ نے شاندار کھیل پیش کرتے ہوئے سنچری مکمل کی اور 126 رنز بناکر پویلین لوٹ گئے۔
تیسرے آؤٹ ہونے والے بیٹسمین اظہر علی تھے جو 18 رنز پر ہالینڈ کی گیند پر اسٹارک کو کیچ تھما بیٹھے۔
واضح رہے کہ متحدہ عرب امارات میں دونوں ٹیموں کے درمیان آخری ٹیسٹ میچ 2014 میں کھیلا گیا تھا جس میں قومی ٹیم نے آسٹریلیا کو 221 رنز سے شکست دی تھی۔
