ٹیسٹ کرکٹر احمد شہزاد پر 4 ماہ کی پابندی عائد

پاکستان کرکٹ بورڈ (پی سی بی) نے ٹیسٹ کرکٹر احمد شہزاد پر 4 ماہ کی پابندی عائد کر دی۔

احمد شہزاد کا پاکستان کپ کے دوران ڈوپ ٹیسٹ لیا گیا جس میں حشیش کی مقدار پائی گئی جس کے بعد پی سی بی نے 11 جولائی کو انہیں چارج کرکے معطل کر دیا تھا۔

پاکستان کرکٹ بورڈ نے احمد شہزاد پر  4 ماہ کی پابندی عائد کر دی جس کا اطلاق 10 جولائی سے ہو گا۔ پی سی بی کے مطابق احمد شہزاد پر پی سی بی اینٹی ڈوپنگ قوانین کی خلاف ورزی پر پابندی لگائی گئی ہے۔

دوسری جانب سماجی رابطوں کی ویب سائیٹ ٹویٹر پر اپنے ایک ٹویٹ میں احمد شہزاد کا کہنا تھا کہ پی سی بی کی طرف سے لگائی گئی 4 ماہ کی پابندی کو قبول کرتا ہوں۔ ممنوعہ ادوایات کا استعمال کیا جو نہیں کرنا چاہیے تھا، یہ میرے اور ساتھی کرکٹرز کے لیے سبق ہے، امید ہے میں جلد کرکٹ میں واپس آ جاؤں گا۔

https://twitter.com/iamAhmadshahzad/status/1048235963342880769

یاد رہے کہ ٹیسٹ اوپنر احمد شہزاد کے ڈوپ سیمپل میں حشیش کی مقدار پائی گئی تھی اور حشیش کا نشہ عام طور پر تفریحی نشہ کہلاتا ہے جس کا شمار قوت بخش ادویات میں نہیں ہوتا۔

واضح رہے کہ ڈوپ ٹیسٹ مثبت آنے کے بعد احمد شہزاد کو ان کے ڈپارٹمنٹ حبیب بینک نے کپتانی سے بھی ہٹا دیا تھا اور ان کا نام قائد اعظم ٹرافی کے ممکنہ کھلاڑیوں کی فہرست میں بھی شامل نہیں کیا گیا تھا۔