ایشیاء کپ کا میگا میچ یکطرفہ مقابلہ ثابت ہوا، گرین شرٹس کو 8 وکٹوں سے شکست
دبئی سٹیڈیم میں کھیلے گئے اہم میچ میں پاکستان کی بیٹنگ لائن مکمل طور پر ناکام ہوگئی اور 44ویں اوور میں 162 رنز پر پویلین لوٹ گئی جس کے جواب میں بھارت نے مطلوبہ ہدف بہ آسانی 2 وکٹوں کے نقصان پر 29 اوورز میں پورا کرلیا۔
متحدہ عرب امارات میں جاری ایشیا کپ کا میگا میچ میں بھارت نے یکطرفہ مقابلے کے بعد پاکستان کو 8 وکٹوں سے شکست دیدی۔
دبئی سٹیڈیم میں کھیلے گئے اہم میچ میں پاکستان کی بیٹنگ لائن مکمل طور پر ناکام ہوگئی اور 44ویں اوور میں 162 رنز پر پویلین لوٹ گئی جس کے جواب میں بھارت نے مطلوبہ ہدف بہ آسانی 2 وکٹوں کے نقصان پر 29 اوورز میں پورا کرلیا۔
میچ کے آغاز پر پاکستان نے ٹاس جیت کر پہلے بیٹنگ کا فیصلہ کیا تو قومی ٹیم کی جانب سے اننگز کا آغاز امام الحق اور فخرزمان نے کیا۔
تاہم اوپنرز پراعتماد آغاز فراہم کرنے میں ناکام رہے اور صرف 3 رنز پر 2 کھلاڑی پویلین واپس لوٹ گئے، امام الحق صرف 2 رنز جب کہ فخرزمان بغیر کوئی رن بنائے آؤٹ ہوگئے۔
اس کے بعد شعیب ملک اور بابر اعظم کے درمیان تیسری وکٹ کے لیے 82 رنز کی اہم شراکت قائم ہوئی تاہم بابر اعظم غلط شارٹ کھیلتے ہوئے 47 رنز سکور کرکے بولڈ ہوگئے۔
بابراعظم کے آؤٹ ہونے کے بعد کپتان سرفراز احمد خود بیٹنگ کے لیے آئے لیکن وہ توقعات کے برخلاف صرف 6 رنز کے مہمان ثابت ہوئے، کپتان کے آؤٹ ہوتے ہی شعیب ملک بھی 43 رنز پر رن آؤٹ ہوگئے۔
ٹاپ آرڈر کی ناکامی کے بعد مڈل آرڈر نے بھی مایوس کن کارکردگی کا مظاہرہ کیا، آصف علی بھی صرف چند ہی گیندوں کے مہمان ثابت ہوئے، وہ 9 رنز بناکر پویلین لوٹے جب کہ آل راؤنڈر شاداب خان کی اننگز بھی 8 رنز تک محدود رہی
آل راؤنڈر فہیم اشرف نے محمد عامر کے ساتھ ملکر ساتویں وکٹ کے لیے 37 قیمتی رنز جوڑے مگر فہیم اشرف جسپرٹ بمرا کا شکار بن گئے، وہ 21 رنز ہی بناسکے جب کہ حسن علی تیسری ہی گیند پر پویلین واپس لوٹ گئے، محمد عامر آخر تک مزاحمت کرتے رہے اور 18 رنز پر ناٹ آؤٹ رہے۔
بھارت کی جانب سے بھنویشور کمار اور کیدار جادیو نے 3،3 جب کہ جسپرٹ بمرا نے 2 کھلاڑیوں کو آؤٹ کیا۔
اس کے برعکس بھارت کی جانب سے کپتان روہت شرما اور شیکھر دھون نے اننگز کا پراعتماد آغاز کیا اور دونوں نے 86 رنز کی اوپننگ شراکت قائم کی۔
اس دوران کپتان روہت شرما 52 رنز کی جارحانہ اننگز کھیل کر شاداب خان کا شکار بنے، ان کی اننگز میں 3 چھکے اور 6 چوکے شامل تھے۔
کپتان کے آؤٹ ہونے کے بعد شیکھر دھون نے اننگز کو آگے بڑھانا شروع کیا لیکن 104 رنز کے مجموعی سکور پر وہ فہیم اشرف کا شکار بن گئے، دھون 46 رنز کی اننگز کھیل کر آؤٹ ہوئے۔
اس کے بعد امباٹی رائیڈو اور دنیش کارتک نے تیسری وکٹ کے لیے 60 رنز کی شراکت قائم کرتے ہوئے ٹیم کو فتح سے ہمکنار کروایا، دونوں بلے باز 31، 31 رنز پر ناقابل شکست رہے۔
