ایشیاء کپ، سری لنکن شیر ڈھیر، بنگلہ ٹائیگرز نے 137 رنز سے پہلا میچ اپنے نام کر لیا
دبئی میں سجے ایشیا کپ میلے کے پہلے میچ میں بنگلہ دیش نے سری لنکن ٹیم کو 262 رنز کا ہدف دیا جس کے جواب میں سری لنکا کی پوری ٹیم محض 124 رنز پر آل آؤٹ ہو گئی۔
ایشیا کپ کے پہلے میچ میں بنگلہ دیشی ٹائیگر نے سری لنکن شیر کو ڈھیر کر دیا سری لنکا کو 137 رنز سے شکست کے ساتھ بنگلہ دیش نے میچ اپنے نام کر لیا۔
دبئی میں سجے ایشیا کپ میلے کے پہلے میچ میں بنگلہ دیش نے سری لنکن ٹیم کو 262 رنز کا ہدف دیا جس کے جواب میں سری لنکا کی پوری ٹیم محض 124 رنز پر آل آؤٹ ہو گئی۔
قبل ازیں بنگلہ دیش نے ٹاس جیت کر سری لنکا کے خلاف بیٹنگ کا فیصلہ کیا تو سری لنکا کے لاستھ مالنگا نے پہلے ہی اوور میں بنگال ٹائیگر کے دو کھلاڑیوں لٹن داس اور شکیب الحسن کو پویلین لوٹنے پر مجبور کردیا۔
یہی نہیں بلکہ بنگلہ دیش کو دھچکا اس وقت لگا جب دوسرے ہی اوور میں تین کے مجموعی اسکور پر اوپننگ بلے باز گیند لگنے سے زخمی ہوگئے اور انہیں ریٹائرڈ ہرٹ ہونا پڑا۔
اس کے بعد مشفق الرحیم اور محمد متھن نے ذمہ دارانہ کھیل کا مظاہرہ کرتےہوئے 131 رنز کی اہم شراکت قائم کی تاہم متھن 2 چھکوں اور 5 چوکوں کی مدد سے 63 رنز کی انتہائی اہم اننگز کھیل کر آؤٹ ہوئے۔
متھن کے بعد تجربہ کار بلے باز محمد اللہ اور مصدق حسین میدان میں اترے تاہم دونوں ایک ایک رنز کے ہی مہمان ثابت ہوئے۔
کھلاڑیوں کے پویلین لوٹنے کے باوجود مشفق الرحیم نے اپنی ذمہ دارانہ اننگز جاری رکھتے ہوئے 4 چھکوں اور 11 چوکوں کی مدد سے 144 رنز کی یادگار اننگز کھیلی اور آؤٹ ہوئے۔
سری لنکا کی جانب سے لیستھ ملنگا نے 4 اور ڈی سلوا نے 2 وکٹیں حاصل کیں۔
جواب میں سری لنکا کی جانب سے اپل تھرانگا اور کوسل مینڈس نے اننگز کا آغاز کیا لیکن مینڈس دوسرے ہی اوور میں بغیر کوئی رنز بنانے کے بعد مستفیض الرحمان کا شکار بن گئے۔
دوسری جانب تھرنگا نے 27 رنز کی جارحانہ اننگز کھیلی مگر تیسرے ہی اوور میں مشرفی مرتضیٰ نے انہیں پویلین بھیج دیا۔
بنگلہ دیش کی طرح سری لنکا کیلئے بھی اننگز کا آغاز مایوس کن رہا اور 38 رنز پر ہی 4 کھلاڑی پویلین واپس لوٹ گئے۔
اس کے بعد کوشل پریرا 11 اور دھنانجایا ڈی سلوا بغیر کوئی رنز بنائے آؤٹ ہوئے جب کہ کپتان اینجلو میتھیوز بھی صرف 16 رنز کے مہمان ثابت ہوئے اور داسن شناکا 7 رنز ہی بناسکے جس کے بعد پوری ٹیم محض 124 رنز پر آل آؤٹ ہوگئی اور ٹیم کو بہت بڑے مارجن 137 رنز سے شکست کا سامنا کرنا پڑا۔
واضح رہے کہ پاکستانی ٹیم کل اتوار کو پہلا میچ ہانگ کانگ کے خلاف کھیلے گی جب کہ قومی ٹیم کا روایتی حریف بھارت کے ساتھ مقابلہ 19 ستمبر کو ہوگا۔
