آسیہ بی بی کیس، سپریم کورٹ کے فیصلے پر کوئی سمجھوتہ نہیں ہوگا۔ وزیراعظم

وزیراعظم عمران خان نے واضح کیا ہے کہ حکومت آسیہ بی بی کیس کے حوالے سے سپریم کورٹ کے فیصلے کیساتھ کھڑی ہے جس پر کوئی سمجھوتا نہیں ہوگا۔

لاہور میں ایک تقریب سے خطاب کرتے ہوئے وزیراعظم عمران خان نے کہا کہ حکومت میں ملک میں قانون کی بالادستی چاہتی ہے، قانون کی حکمرانی سپریم کورٹ کے فیصلوں پر عملدرآمد کرنے سے ممکن ہے لہذا سپریم کورٹ کے فیصلوں پرمکمل عمل درآمد ہوگا۔

وزیراعظم نے کہا کہ غربت کے خاتمے کے لیے اقدامات کریں گے اور آنے والے دنوں میں غربت ختم کرنے کیلیے ایک پیکیج لے کر آئیں گے اور پاکستان ایک ایسا ملک بنے گا جو دنیا میں مثال ہوگا۔

انہوں نے کہ ہم وسائل نہیں احساس کی کمی کاشکار ہیں، احساس اور رحم کے بغیر کوئی معاشرہ مکمل نہیں ہوسکتا۔

عمران خان کا کہنا تھا کہ ہم نے احساس پر مبنی ایک معاشرے کو تشکیل دینا ہے، احساس اور رحم کے جذبے کے تحت شیلٹر ہوم بنانے کا فیصلہ کیا، مفلس لوگوں کو دیکھ کر جس کے دل میں رحم نہ آئے وہ انسان ہی نہیں۔

لاہور میں رات کو کھلے آسمان تلے سونے والوں کے لیے 5 پناہ گاہیں قائم کرنے کا اعلان کرتے ہوئے وزیراعظم عمران خان نے کہا کہ ان پناہ گاہوں میں مکمل سہولیات میسر ہوں گی۔

انہوں نے کہا کہ حکومتیں چلتی رہتی ہیں لیکن فلاحی منصوبوں پر کام کرنے سے خوشی ہوتی ہے۔

وزیراعظم کے مطابق حکومت میں آتے ہی مشکلات کا سامنا کرنا پڑا، ملک کے قرضوں کی قسطیں ادا کرنے کے لیے ڈھائی ماہ لگ گئے، ملک کو ڈیفالٹ ہونے سے بچانے کے لیے اقدامات کیے اور اب ملک بحران سے نکل گیا ہے۔

وزیراعظم نے کہا کہ پنجاب میں بادشاہت کا تصور بن چکا تھا لیکن میں نے ایک پسماندہ علاقے سے تعلق رکھنے والے شخص کو وزیراعلیٰ پنجاب بنایا۔

انہوں نے مزید کہا کہ کل کرپشن سے متعلق بات کروں گا اور ایسی گفتگو ہوگی جس کو آپ انجوائے کریں گے۔