آسیہ بی بی کی بریت، وفاقی حکومت کا مظاہرین کے ساتھ مذاکرات کا فیصلہ

وفاقی حکومت نے سپریم کورٹ کی جانب سے توہین رسالت کے الزام سے مسیحی خاتون آسیہ بی بی کی بریت کیخلاف جاری مظاہروں کے خاتمے کیلئے مذاکرات کا فیصلہ کر لیا اور اس مقصد کیلئے کمیٹی تشکیل دیدی۔

ذرائع کے مطابق وزیراعظم عمران خان کی زیر صدارت وفاقی کابینہ کے اجلاس میں معاملہ افہام و تفہیم سے حل کرانے پر اتفاق کیا گیا اور اس مقصد کیلئے مذاکراتی ٹیم تشکیل دی گئی جس میں وفاقی وزیر اطلاعات فواد چوہدری، وزیر خارجہ شاہ محمود قریشی، وزیر مملکت برائے داخلہ شہریار آفریدی، وفاقی وزیر برائے مذہبی امور نور الحق قادری اور وزیر برائے فوڈ سیکیورٹی محبوب سلطان شامل ہیں۔

ذرائع کا کہنا ہے کہ وفاقی وزراء نور الحق اور محبوب سلطان مظاہرین کی قیادت سے ملاقات کریں گے جبکہ مذاکرات کی نگرانی وزیراعظم خود کریں گے۔

کابینہ اجلاس میں وزیراعظم عمران خان نے وزرا کو دورہ چین پر اعتماد میں لیا جب کہ کابینہ نے اقوام متحدہ کے امن مشن کے حوالے سے پاک چین معاہدے کی منظوری بھی دی۔

خیال رہے کہ وزیراعظم آج چین کے لیے روانہ ہورہے ہیں۔

کابینہ کے اجلاس میں میجر جنرل فیاض حسین شاہ کی بطور آئی جی ایف سی بلوچستان اور میجر جنرل راحت حسین احمد کی بطور آئی جی ایف سی خیبرپختون خوا تقرری کی منظوری دی گئی جبکہ ریڈیو پاکستان بورڈ کی تنظیم نو کا بھی فیصلہ کیا گیا۔

وفاقی کابینہ نے چیئرمین ویج بورڈ کے استعفے جبکہ آٹھویں ویج بورڈ کے چیئرمین کے تقرر کی منظوری کے علاوہ پاکستان ایل این جی ٹرمینلز کے ڈائرکٹرز کے تقرر کی اجازت بھی دی گئی۔

واضح رہے کہ گذشتہ روز سپریم کورٹ آف پاکستان نے توہین رسالت کے جرم میں سزائے موت پانے والی مسیحی خاتون آسیہ بی بی کو ناکافی شواہد کی بناء پر بری کردیا تھا جس کے بعد مذہبی جماعتوں کی جانب سے احتجاجی مظاہرے شروع کیے گئے جس کا سلسلہ آج بھی جاری ہے۔

احتجاجی مظاہروں کے بعد گزشتہ روز قوم سے اپنے خطاب میں وزیراعظم عمران خان نے آسیہ بی بی کیس میں سپریم کورٹ کے فیصلے  کو آئین کے مطابق قرار دیتے ہوئے ملک دشمن عناصر کو وارننگ دی کہ اپنی سیاست اور ووٹ بینک کے لیے اس ملک کو نقصان نہ پہنچائیں اور ریاست سے مت ٹکرائیں۔

ان کا کہنا تھا کہ ریاست اپنی ذمہ داری پوری کرے گی اور لوگوں کی جان و مال کی وحفاظت کرے گی لہٰذا ریاست کو ایکشن لینے پر مجبور نہ کیا جائے۔