ڈاکٹر عافیہ صدیقی کیس میں مبینہ کرپشن کی تحقیقات کی درخواست پر متعلقہ حکام سے جواب طلب

اسلام آباد ہائی کورٹ نے ڈاکٹر عافیہ صدیقی کیس کی پیروی میں مبینہ کرپشن کی تحقیقات کی درخواست پر متعلقہ حکام سے جواب طلب کرلیا۔

اسلام آباد ہائیکورٹ کے جج جسٹس عامر فاروق نے امریکا میں ڈاکٹر عافیہ صدیقی کیس کی پیروی میں مبینہ کرپشن کی تحقیقات سے متعلق درخواست کی سماعت کی۔

درخواست گزار کے وکیل نے عدالت کو بتایا کہ حکومتِ پاکستان نے کیس کے لئے 2010 میں 20 لاکھ ڈالر امریکہ میں پاکستانی سفارت خانے کو جاری کئے جس میں امریکہ میں تب کے پاکستانی سفیر حسین حقانی نے کرپشن کی۔

وکیل نے کا مزید کہنا تھا کہ کرپشن الزامات پر تحقیقاتی کمیٹی بنی لیکن اس کی رپورٹ جاری نہیں کی گئی۔

انہوں نے عدالت سے استدعا کی کہ 2008 سے2011 کے درمیان کیس میں اخراجات کی تفصیلات فراہمی کا حکم جاری کرے۔

عدالت نے درخواست گزار کا موقف سننے کے بعد سیکریٹری خارجہ، محکمہ قانون و انصاف اور وزارت خزانہ سے جواب طلب کر لیا۔