سانحہ بارہ مئی کیس، میئر کراچی وسیم اختر سمیت 21 ملزمان پر فرد جرم عائد

سانحہ بارہ مئی کیس میں میئر کراچی اور متحدہ قومی موومنٹ پاکستان کے رہنما وسیم اختر سمیت 21 ملزمان پر دوسرے مقدمے میں بھی فرد جرم عائد کردی گئی۔

کراچی کی انسدادِ دہشتگردی کی خصوصی عدالت میں سانحہ بارہ مئی کے مقدمات کی سماعت ہوئی اور میئر کراچی وسیم اختر سمیت 21 ملزمان عدالت میں پیش ہوئے۔

خصوصی عدالت نے 4 مقدمات میں سے ایک مقدمے میں ملزمان پر فردِ جرم عائد کردی تاہم تمام ملزمان نے صحتِ جرم سے انکار کردیا جس پر عدالت نے گواہوں کو نوٹس جاری کرتے ہوئے 27 اکتوبر کو طلب کرلیا۔

واضح رہے کہ 12 مئی 2007 کو سابق صدر جنرل (ر) پرویز مشرف کے دور آمریت میں وکلا تحریک کے دوران معزول چیف جسٹس افتخار چوہدری کی کراچی آمد پر ایم کیو ایم کے کارکنوں کی فائرنگ سے وکلا سمیت کم از کم 50 افراد جاں بحق ہوگئے تھے۔

خیال رہے کہ ملزمان کے خلاف 4 مقدمات ائیرپورٹ تھانے میں درج کئے گئے تھے جن میں سے مقدمہ نمبر 86/2007 میں فردِ جرم عائد کی گئی ہے جب کہ اس سے پہلے بھی ایک کیس میں فرد جرم عائد کی جاچکی ہے۔

علاوہ ازیں عدالت مذکورہ مقدمے کے 9 مفرور ملزمان کو اشتہاری بھی قرار دے چکی ہے۔