پرویز مشرف کو سپریم کورٹ پیشی تک گرفتار نہ کیا جائے۔ جسٹس میاں ثاقب نثار
این آر او کیس کی سماعت کرتے ہوئے چیف جسٹس نے ریمارکس دیئے کہ اگر وہ لال مسجد کیس میں کالم نمبر 2 میں شامل ہیں تو ملزم نہیں ہوں گے، ملک کی سب سے بڑی عدالت یقین دہانی کروا رہی ہے، اگر انہیں باہر رہنا ہے تو رہیں لیکن جب تک پرویز مشرف حیات ہیں انہیں پیش ہونا پڑے گا۔
چیف جسٹس پاکستان جسٹس میاں ثاقب نثار نے ایک بار پھر حکم دیا ہے کہ سابق صدر جنرل (ر) پرویز مشرف کو سپریم کورٹ پیشی تک گرفتار نہ کیا جائے۔
چیف جسٹس پاکستان جسٹس ثاقب نثار کی سربراہی میں 3 رکنی بنچ نے این آر او کیس میں پرویز مشرف کی واپسی کے معاملے پر سماعت کی۔
عدالتی استفسار پر سابق صدر کے وکیل نے کہا کہ پرویز مشرف عدالت کا احترام کرتے ہیں لیکن ان کے خلاف کئی مقدمات عدالتوں میں چل رہے ہیں۔
ان کا کہنا تھا کہ خصوصی عدالت نے پرویز مشرف کو مفرور قرار دے رکھا ہے، لال مسجد آپریشن میں فوج کو سول فورسز کی مدد کے لیے بلایا گیا لیکن انہیں لال مسجد کیس میں ملزم بنایا گیا۔
سابق صدر کے وکیل نے عدالت سے استدعا کی کہ پرویز مشرف کو سنجیدہ بیماری لاحق ہے جن کا ڈاکٹرز نے چیک اپ کیا ہے، جس کی رپورٹ جلد عدالت میں پیش کر دی جائے گی۔
چیف جسٹس نے ریمارکس دیئے کہ اگر وہ لال مسجد کیس میں کالم نمبر 2 میں شامل ہیں تو ملزم نہیں ہوں گے، ملک کی سب سے بڑی عدالت یقین دہانی کروا رہی ہے، اگر انہیں باہر رہنا ہے تو رہیں لیکن جب تک پرویز مشرف حیات ہیں انہیں پیش ہونا پڑے گا۔
چیف جسٹس نے کہا کہ خصوصی عدالت میں بغاوت کے مقدمے میں بیان ریکارڈ کرائیں، یہ نہیں ہوسکتا کہ وہ اعلیٰ عدلیہ کے بلانے پر نہ آئیں۔
جسٹس ثاقب نثار نے ریمارکس دیے کہ پرویز مشرف کمانڈو ہیں، وہ جرات دکھائیں اور رضاکارانہ طور پر واپس آجائیں، ایسا نہ ہو انہیں ایسے حالات میں واپس آنا پڑے جو ان کے لیے مناسب نہ ہوں، ان کی حاضری یقینی بنانے کے لیے ریڈ وارنٹ جاری کرنا پڑے تو کریں گے۔
انہوں نے کہا کہ عدالت انہیں حفاظت دے رہی ہے، رینجرز پرویز مشرف کوسکیورٹی فراہم کرے گی، عدالت آنے تک انہیں کوئی نہیں پکڑے گا، اس کے بعد قانون اپنا راستہ اختیار کرے گا۔
چیف جسٹس نے پرویز مشرف کے وکیل سے ایک ہفتے میں میڈیکل رپورٹ طلب کرتے ہوئے حکم دیا ہے کہ پرویز مشرف کو سپریم کورٹ پیشی تک گرفتار نہ کیا جائے، پیشی کے بعد مناسب حکم جاری کیا جائے گا۔
