جعلی بینک اکاؤنٹ کا ایک اور کیس سامنے آگیا، کراچی میں فالودہ بیچنے والا شخص کروڑوں کا مالک

جعلی بینک اکاؤنٹ کا ایک اور کیس سامنے آگیا اور کراچی میں فالودہ بیچنے والا ایک شخص بیٹھے بٹھائے ککھ پتی سے ارب پتی بن گیا۔

میڈیا رپورٹس کے مطابق کراچی کے علاقے اورنگی ٹاؤن کا رہائشی عبدالقادر نامی شخص اس حقیقت سے لاعلم ہے کہ وہ کروڑوں کا مالک ہے۔

عبدالقادر کے مطابق ایف آئی اے کے طلب کرنے پر انہیں علم ہوا کہ ان کے نام پر بینک اکاؤنٹ ہے اور اس میں 225 کروڑ روپے کی رقم موجود ہے۔

عبدالقادر کا کہنا تھا کہ وہ انگوٹھا چھاپ ہیں اور 40 گز کے مکان میں رہتے ہیں اور اس رقم سے ان کا کوئی تعلق نہیں اور نہ انہیں علم ہے کہ یہ رقم کہاں سے آئی۔

دوسری جانب اورنگی ٹاؤن میں عبدالقادر کے گھر کے اطراف پولیس تعینات کردی گئی ہے۔

اہل کاروں کا اس حوالے سے کہنا تھا کہ عبدالقادر کے نام پر اکاؤنٹ بنانے والے اسے نقصان پہنچا سکتے ہیں اس لیے انہیں اس کی حفاظت کے لیے بھیجا گیا ہے۔