وفاقی حکومت کا وزیراعظم ہاؤس کو جدید یونیورسٹی جب کہ گورنر ہاؤسز کو میوزیم بنانے کا اعلان

وفاقی حکومت نے وزیراعظم ہاؤس کو جدید یونیورسٹی جب کہ گورنر ہاؤسز کو میوزیم بنانے کا اعلان کر دیا۔

اسلام آباد میں ایک پریس کانفرنس کے موقع پر وفاقی وزیرتعلیم شفقت محمود کا کہنا تھا کہ عوام حکومتوں کے شاہانہ طریقوں سے پریشان ہیں اس لئے وزیراعظم عمران خان نے خود فیصلہ کیا ہے کہ وہ وزیراعظم ہاوٴس میں نہیں رہیں گے جب کہ چاروں صوبوں کے گورنرز بھی گورنر ہاوٴسز میں نہیں رہیں گے۔

وزیرتعلیم نے بتایا کہ وزیراعظم ہاوٴس اسلام آباد ایک ہزار 96 کنال پر مشتمل ہے اور اس کا سالانہ خرچہ 47 کروڑ روپے ہے اس لیے حکومت نے فیصلہ کیا ہے کہ وزیراعظم ہاوٴس کو اعلیٰ درجے کی یونیورسٹی بنایا جائے گا جب کہ وزیر اعظم ہاوٴس کے پیچھے زمین پر مزید تعمیرات بھی ہوگی۔

شفقت محمود کا کہنا تھا کہ یہ تعلیمی ادارہ پاکستان میں منفرد ہوگا جس کیلئے پی سی ون کی تیاری کے ساتھ پلان بھی تشکیل دیا جائے گا۔

وفاقی وزیر نے کہا کہ پنجاب حکومت نے گورنر ہاوٴس مری پر 60 کروڑ روپے لگائے اور اس کا سالانہ خرچہ ساڑھے 3 سے 4 کروڑ ہے جبکہ مری ہی میں پنجاب ہاوٴس پر ڈھائی کروڑ سالانہ خرچ ہو رہا ہ۔

شفقت محمود کے مطابق گورنر ہاؤس مری کو ہیریٹیج بوتیک ہوٹل بنایا جائے گا جب کہ پنجاب ہاؤس مری کے حوالے سے پنجاب حکومت تمام اعدادوشمار اکٹھے کر کے اسے ٹوریسٹ ریزورٹ بنائے گی۔

وفاقی وزیر نے بتایا کہ گورنر ہاؤس لاہور کی مال روڈ والی دیوار گرا کر وہاں خوبصورت جنگلہ لگایا جائے گا جس سے اندر کا خوبصورت منظر دکھائی دے گا۔

انہوں نے کہا کہ لاہور میں موجود چنبھا ہاؤس کو گورنر آفس بنا دیا جائے گا جبکہ سٹیٹ گیسٹ ہاؤس کو ایک فائیو سٹار ہوٹل بنانے کی تجویز دی گئی ہے۔

ان کا کہنا تھا کہ گورنر ہاؤس بلوچستان اور خیبرپختونخوا کو میوزیم میں تبدیل کیا جائے گا جب کہ کراچی کے گورنر ہاؤس کو بھی میوزیم میں تبدیل کرنے کی تجویز ہے۔

وفاقی وزیر کے مطابق حکومت کے ساتھ مل کر گورنر ہاؤسز پر فیصلہ کیا جائے گا جبکہ ایوان صدر سے متعلق فیصلے دوسرے مرحلے میں کیے جائیں گے۔