سابق وزیراعظم نواز شریف، مریم نواز اور کیپٹن (ر) صفدر کی پیرول پر رہائی میں 5 روز کی توسیع
واضح رہے کہ بیگم کلثوم نواز کی تجہیز و تدفین میں شرکت کے لیے رات گئے نوازشریف، مریم اور صفدر کو اڈیالہ جیل سے 12 گھنٹے کے لیے پیرول پر رہا کیا گیا تھا۔
سابق وزیراعظم نواز شریف، ان کی بیٹی مریم نواز اور داماد کیپٹن (ر) صفدر کی پیرول پر رہائی میں 5 روز کی توسیع کردی گئی۔
محکمہ داخلہ پنجاب میں موجود ذرائع کے مطابق صوبائی کابینہ نے نواز شریف، مریم نواز اور کیپٹن (ر) صفدر کی پیرول پر رہائی میں5 روز کی توسیع کی منظوری دی ہے۔
واضح رہے کہ بیگم کلثوم نواز کی تجہیز و تدفین میں شرکت کے لیے رات گئے نوازشریف، مریم اور صفدر کو اڈیالہ جیل سے 12 گھنٹے کے لیے پیرول پر رہا کیا گیا تھا۔
گزشتہ روز صدر (ن) لیگ شہباز شریف نے نواز شریف، مریم نواز اور کیپٹن (ر) صفدر کو 5 روز کے لیے پیرول پر رہا کرنے کی درخواست کی تھی کیونکہ میت لندن سے لانے اور تدفین میں کم از کم 3 دن لگیں گے تاہم پنجاب حکومت نے ابتدائی طور پر تینوں افراد کو 12 گھنٹے کے لیے رہائی کی اجازت دی تھی جس میں اب مزید 5 روز کی توسیع کر دی گئی۔
محکمہ داخلہ پنجاب نے جاتی امرا کے تین کمروں کو سب جیل قرار دے دیا ہے جس کی وجہ سے تینوں افراد اپنے اپنے کمروں میں محدود رہنے اور جیل قوائد کے پابند ہیں۔
نواز شریف اور اہل خانہ کی حفاظت یقینی بنانے کے لیے جاتی امرا کی سیکیورٹی پر بھاری نفری تعینات ہے۔
واضح رہے کہ گزشتہ روز سابق وزیر اعظم نواز شریف کی اہلیہ بیگم کلثوم نواز کا کینسر کے باعث لندن کے ہسپتال میں انتقال ہوگیا تھا۔
ان کی نمازِجنازہ جمعرات کو لندن میں ریجنٹ پارک مسجد میں ادا کی جائے گی۔
