پارٹی سمیت مختلف حلقوں کی تنقید و احتجاج کے بعد عاطف میاں کو اکنامک ایڈوائزری کونسل کی رکنیت سے ہٹا دیا گیا

پاکستان تحریک انصاف کے اپنے ورکرز سمیت اپوزیشن جماعتوں اور ملک کے مختلف حلقوں کی سخت تنقید اور شدید احتجاج کے بعد عاطف میاں کو حکومت کی اکنامک ایڈوائزری کونسل کی رکنیت سے ہٹا دیا گیا ہے۔

Atif Mian was asked to step down from the Advisory Council and he has agreed. A replacement would be announced later.

— Faisal Javed Khan (@FaisalJavedKhan) September 7, 2018

سماجی رابطوں کی ویب سائٹ ٹوئٹر پر اپنے ایک پیغام میں پی ٹی آئی سینیٹر فیصل جاوید کا کہنا تھا کہ عاطف میاں سے اکنامک ایڈوائزری کونسل کی ممبرشپ واپس لے لی گئی ہے تاہم ان کی جگہ نئے رکن کی تعیناتی کا اعلان جلد کیا جائے گا۔

حکومت نے فیصلہ کیا ہے کہ عاطف میاں کی اقتصادی مشاورتی کمیٹی سے نامزدگی واپس لے لی جائے،حکومت علماء اور تمام معاشرتی طبقات کو ساتھ لے کر ہی آگے بڑھنا چاہتی ہے اور اگر ایک نامزدگی سے مختلف تاثر پیدا ہوتا ہے تو یہ مناسب نہیں۔

— Ch Fawad Hussain (@fawadchaudhry) September 7, 2018

دوسری جانب ٹوئٹر پر ہی وزیر اطلاعات فواد چوہدری کا اطلاع کی تصدیق کرتے ہوئے کہنا تھا کہ حکومت نے فیصلہ کیا ہے کہ عاطف میاں کی اقتصادی مشاورتی کمیٹی سے نامزدگی واپس لے لی جائے، حکومت علماء اور تمام معاشرتی طبقات کو ساتھ لے کر ہی آگے بڑھنا چاہتی ہے اور اگر ایک نامزدگی سے مختلف تاثر پیدا ہوتا ہے تو یہ مناسب نہیں۔

عمران خان کا آئیڈیل ریاست مدینہ ہے، اور وزیر اعظم اور ان کی کابینہ کے اراکین عاشقان رسول کریم صلی اللہ علیہ وآلہ وسلم ہیں۔ ختم نبوت ہمارے ایمان کا حصہ ہے اور حال ہی میں گستاخانہ خاکوں کے معاملے پر حکومت نے جو کامیابی حاصل کی وہ بھی اسی نسبت کا اظہار ہے۔

— Ch Fawad Hussain (@fawadchaudhry) September 7, 2018

وزیراطلاعات نے ایک اور ٹویٹ میں کہا کہ عمران خان کی آئیڈیل ریاست مدینہ ہے اور وزیراعظم اور ان کی کابینہ کے اراکین عاشقان رسولﷺ ہیں۔ ختم نبوت ہمارے ایمان کا حصہ ہے اور حال ہی میں گستاخانہ خاکوں کے معاملے پر حکومت نے جو کامیابی حاصل کی وہ بھی اسی نسبت کا اظہار ہے۔