’پی ٹی آئی میں شمولیت کے سلسلے میں قریبی دوستوں سے مشاورت کر رہے ہیں‘

متحدہ قومی موومنٹ پاکستان کے رہنما ڈاکٹر فاروق ستار نے پاکستان تحریک انصاف میں شمولیت کے حوالے سے پھر کہا ہے کہ وہ پی ٹی آئی میں شمولیت کے سلسلے میں قریبی دوستوں سے مشاورت کر رہے ہیں۔

واضح رہے کہ گزشتہ روز ایم کیو ایم رہنما فاروق ستار نے میڈیا سے گفتگو کے دوران اس بات کا انکشاف کیا تھا کہ انہیں پی ٹی آئی میں شمولیت کی پیشکش ہوئی ہے ،ساتھ ہی نومنتخب صدر پاکستان عارف علوی کی خالی ہونے والی کراچی کی نشست این اے 247سے ضمنی انتخاب لڑنے کی خواہش کا اظہار بھی کیا گیا ہے

آج ڈاکٹر فاروق ستار نے الیکشن کمیشن آف پاکستان میں انتخابی اخراجات کے حوالے سے پٹیشن دائر کی سماعت میں آئے، اس موقع پر الیکشن کمیشن کے باہر میڈیا سے گفتگو کے دوران انہوں نے پھر بتایا کہ بعض پی ٹی آئی اراکین نے تحریک انصاف میں شمولیت کی دعوت دی جس کے سلسلے میں قریبی دوستوں سے مشاورت کر رہا ہوں۔

ان کا کہنا ہے کہ ڈاکٹر عارف علوی کے صدر مملکت منتخب ہونے کے بعد کراچی سے ان کی نشست این اے 247خالی ہورہی ہے اور پی ٹی آئی رہنماؤں کی کوشش ہے کہ میں اس نشست پر ضمنی الیکشن لڑوں۔

ڈاکٹر فاروق ستار نے اپنی پٹیشن کے حوالے سے بتایا کہ الیکشن کمیشن میں بڑی سیاسی جماعتوں کے بےلگام انتخابی اخراجات کے خلاف درخواست دی ہے، قومی اسمبلی کے رکن کے اخراجات 40لاکھ روپے رکھے گئے ہیں، تاہم سیاسی جماعتیں انتخابات کے ضمن میں لاکھوں اور کروڑوں روپے خرچ کر دیتی ہیں، اس طرح امیدوار کو عام انتخابات میں یکساں مواقع نہیں مل پاتے