وزیراعظم عمران خان سے امریکی وزیرخارجہ مائیک پومپیو کی ملاقات، آرمی چیف بھی موجود

وزیراعظم عمران خان سے امریکی وزیر خارجہ نے ملاقات کی جبکہ اس موقع پر پاک فوج کے سربراہ جنرل قمر جاوید باجوہ بھی موجود تھے۔

مائیک پومپیو کی زیر قیادت وفد میں امریکی فوج کے جنرل جوزف ڈنفورڈ اور دیگر حکام بھی موجود تھے۔

ذرائع کے مطابق ملاقات میں پاکستان کے لیے امریکی امداد کی معطلی کے مسئلے کے علاوہ پاک امریکا تعلقات اور افغانستان میں امن عمل سے متعلق امور پر بھی بات چیت کی گئی۔

قبل ازیں امریکی وزیر خارجہ مائک پومپیو دفتر خارجہ پہنچے جہاں دونوں ممالک کے وفود کے درمیان دو طرفہ، علاقائی اور عالمی امور پر تبادلہ خیال کیا گیا۔

وزیر خارجہ شاہ محمود قریشی نے باہمی اعتماد اور احترام کی بنیاد پر پاک امریکا تعلقات کو ازسرنو بحال کرنے کی ضرورت پر زور دیتے ہوئے کہا کہ پاکستان کے قومی مفادات کا تحفظ کرنا نئی حکومت کی اولین ترجیح ہے۔