کابینہ اجلاس، بیرون ملک اثاثوں کی واپسی کے لیے ٹاسک فورس تشکیل

وزیر اطلاعات فواد چوہدری کا کہنا ہے کہ بیرون ملک اثاثوں کی واپسی کے لیے ٹاسک فورس تشکیل دے دی گئی ہے۔

وفاقی کابینہ کے اجلاس کے بعد پریس کانفرنس کرتے ہوئے فواد چوہدری نے کہا کہ باہر سے پیسے واپس لانے کے لیے ٹاسک فورس قائم کی گئی اور اثاثوں کی ریکوری کے لیے وزیر اعظم ہاؤس میں یونٹ بنانے کا فیصلہ کیا گیا ہے، جبکہ رقوم کی واپسی کے لیے قانون سازی بھی کی جائے گی۔

فواد چوہدری نے بتایا کہ بیرون ملک ایک ارب روپے کی غیر قانونی جائیداد کی نشاندہی کرنے والے کو بیس کروڑ روپے دیئے جائیں گے۔

اس موقع پر مشیر بیرسٹر شہزاد اکبر نے کہا کہ بیرون ملک موجود رقم کی معلومات فراہم کرنے والے کا نام صیغہ راز میں رکھا جائے گا۔

وزیر اطلاعات نے بتایا کہ تعلیم کے شعبے میں بہتری کے لیے بھی وفاقی وزیر تعلیم شفقت محمود کی سربراہی میں ایک ٹاسک فورس قائم کی گئی ہے۔

انہوں نے بتایا کہ مدارس سمیت تمام انگریزی اسکولوں میں بنیادی تعلیم یکساں ہوگی اور نجی اسکولوں کی فیسوں کو بھی مناسب سطح پر لایا جائے گا۔

فواد چوہدری نے بتایا کہ نصاب کے لیے صبوبوں کو شراکت داری دی گئی ہے

وزیر اطلاعات کا مزید کہنا تھا کہ وفاقی کابینہ نے بچوں سے زیادتی اور چائلڈ لیبر کو روکنے کے اقدامات کی بھی منظوری دی ہے۔

ساتھ ہی انہوں نے بتایا کہ اوور سیز پاکستانیوں کے ساتھ رویے کو بہتر بنانے کے لیے بھی اقدامات کیے جائیں گے