پاکستان تحریک انصاف کے ڈاکٹرعارف علوی ملک کے 13ویں صدر منتخب

صدارتی انتخاب کے غیر حتمی و غیر سرکاری نتائج کے مطابق پاکستان تحریک انصاف کے ڈاکٹرعارف علوی ملک کے 13ویں صدر منتخب ہوگئے۔

سینیٹ اور قومی و صوبائی اسمبلیوں سے صدارتی انتخاب کے غیر حتمی غیر سرکاری نتائج جاری کردیئے گئے ہیں جس کے تحت پاکستان تحریک انصاف کے عارف علوی ملک کے 13ویں صدر منتخب ہوگئے ہیں۔

صدارتی انتخاب کے لیے قومی اسمبلی اور سینیٹ میں مجموعی طور پر 430 ارکان نے ووٹ کاسٹ کئے جن میں سے تحریک انصاف کے ڈاکٹرعارف علوی نے 212 ، اپوزیشن جماعتوں کے امیدوار مولانا فضل الرحمان نے 131 جب کہ پیپلز پارٹی کے اعتزاز احسن نے 81 ووٹ حاصل کئے۔

سینیٹ اور قومی اسمبلی میں 2 ارکان نے اپنا ووٹ کاسٹ نہیں کیا جبکہ 6 ووٹ مستر ہوگئے۔

پنجاب اسمبلی میں 354 میں سے 351 ارکان نے ووٹ کاسٹ کئے، جن میں 18 ووٹ مسترد ہوئے جبکہ عارف علوی کو 33، مولانا فضل الرحمان کو 25 جب کہ اعتزاز احسن کو ایک الیکٹورل ووٹ ملا۔

خیبر پختونخوا اسمبلی کے تمام 112 ارکان نے ووٹ کاسٹ کئے، عارف علوی کو 78، مولانا فضل الرحمان کو 26 اور اعتزاز احسن کو 5 ارکان نے ووٹ دیا جبکہ 2 ووٹ مسترد بھی ہوئے۔

اسی طرح سندھ اسمبلی میں 163 میں سے 158 ارکان نے ووٹ ڈالے، پیپلز پارٹی کے اعتزازاحسن کو 39، عارف علوی کو 22 جب کہ مولانا فضل الرحمان کوایک الیکٹورل ووٹ پڑا۔

دوسری جانب بلوچستان اسمبلی میں 61 میں سے60 ارکان نے صدارتی انتخاب میں ووٹ ڈالے، عارف علوی نے 45 جب کہ مولانا فضل الرحمان کو 15 الیکٹورل ووٹ ملے، اعتزاز احسن ایک بھی ووٹ حاصل نہیں کرپائے۔

خیال رہے کہ صدارتی انتخاب کے لیے سینیٹ اور قومی و صوبائی اسمبلیوں میں بیک وقت صبح دس بجے پولنگ کا عمل شروع ہوا جو بلاتعطل شام 4 بجے تک جاری رہا۔

صدارتی انتخاب کیلئے تحریک انصاف نے عارف علوی، پیپلز پارٹی نے اعتزاز احسن جب کہ مسلم لیگ (ن) سمیت دیگر اپوزیشن جماعتوں نے مولانا فضل الرحمان کو میدان میں اتارا تھا۔

انتخاب کے لیے چیف الیکشن کمشنر جسٹس (ر) سردار محمد رضا ریٹرننگ آفیسر جب کہ چاروں صوبائی اسمبلیوں میں ہائی کورٹس کے چیف جسٹس صاحبان اور سینیٹ و قومی اسمبلی میں اسلام آباد ہائی کورٹ کے چیف جسٹس نے پریزائیڈنگ آفیسر کی ذمہ داریاں سر انجام دیں۔