ملک کے 13ویں صدر کے انتخاب کے لیے ووٹنگ کا عمل شروع

ملک کے 13ویں صدر کے انتخاب کے لیے وفاقی پارلیمان اور تمام صوبائی اسمبلیوں میں اراکین خفیہ حق رائے شماری کے تحت ووٹ کاسٹ کر رہے ہیں۔

صدر مملکت کے لیے تحریک انصاف کے ڈاکٹر عارف علوی، پیپلز پارٹی کے اعتزاز احسن اور 4 اپوزیشن جماعتوں (مسلم لیگ (ن)، عوامی نیشنل پارٹی، متحدہ مجلس عمل اور پشتونخوا ملی عوامی پارٹی) کے مشترکہ امیدوار مولانا فضل الرحمان میدان میں ہیں۔

صدارتی انتخاب کے لیے وفاقی پارلیمان (قومی اسمبلی و سینیٹ) اور چاروں صوبائی اسمبلیوں میں موجود ایک ہزار 122 اراکین اپنا ووٹ کاسٹ کریں گے۔

قومی اسمبلی و سینیٹ میں چیف جسٹس اسلام آباد ہائی کورٹ کی سربراہی میں پولنگ کا عمل جاری ہے اور اراکین اپنا ووٹ کاسٹ کر رہے ہیں۔

اسی طرح خیبرپختونخوا اسمبلی میں پریزائیڈنگ افسر چیف جسٹس وقار احمد سیٹھ کی سربراہی میں پولنگ کا آغاز ہوا جب کہ بلوچستان اسمبلی میں بھی چیف جسٹس سیدہ طاہرہ صفدر کی نگرانی میں ووٹنگ کا عمل جاری ہے تاہم سندھ اسمبلی میں اب تک ووٹنگ شروع نہ ہوسکی۔

بیلٹ پیپر پر پیپلز پارٹی کے امیدوار اعتزاز احسن کا نام پہلے نمبر پر موجود ہے جب کہ تحریک انصاف کے امیدوار ڈاکٹر عارف علوی دوسرے اور مولانا فضل الرحمان کا نام تیسرے نمبر پر درج ہے۔

پولنگ کا عمل مکمل ہونے پر تمام  پریذائڈنگ افسران ووٹوں کی تفصیلات کا اعلان کریں گے تاہم صدارتی انتخاب کے لیے چیف الیکشن کمشنر جسٹس (ر) سردار محمد رضا ریٹرنگ آفیسر ہیں جو حتمی نتیجے کا اعلان کریں گے