بھاری بستوں سے بچوں کی صحت متاثر ہو رہی ہے، وزن کم کیا جائے۔ پشاور ہائی کورٹ

پشاور ہائی کورٹ نے حکم جاری کیا ہے کہ سکول بیگز کا وزن کم کیا جائے کہ ان بھاری بستوں سے بچوں کی صحت متاثر ہورہی ہے۔

پشاور ہائیکورٹ میں بھاری سکول بیگز کے خلاف دائر درخواست کی سماعت ہوئی اور اس موقع پر سیکرٹریز ہائیر ایجوکیشن، ایلمنٹری اینڈ پرائمری ایجوکیشن، ایم ڈی ریگولیٹری اتھارٹی اور سکول پرنسپل عدالت میں پیش ہوئے۔

دوران سماعت جسٹس قیصر رشید نے کہا کہ ایسا فارمولا بنائیں کہ معصوم بچوں کی کتابیں کم سے کم ہوں (کیونکہ) بھاری اسکول بیگز سے بچوں کی صحت متاثر ہوتی ہے، انہیں کم کرنا ہوگا۔
انہوں نے کہا کہ نجی سکول بچوں کو مہنگے داموں کتابیں دے رہے ہیں جو والدین پر ایک اضافی بوجھ ہے۔

عدالت نے ریمارکس دیے کہ تعلیمی بورڈز میں پوزیشن کیلئے سکولوں کے درمیان دوڑ لگی ہوئی ہے، یہ کیسے ممکن ہے کہ طالب علم 1100 میں سے 1080 نمبر لیتے ہیں؟ اس مسئلے کو اب حل کرنا ہوگا۔

عدالت عالیہ نے آئندہ سماعت پر تمام تعلیمی بورڈز کے چیئرمین طلب کرتے ہوئے حکم دیا کہ صرف کاغذی کارروائی نہیں عملی کام کر کے آئیں۔