وزیراعظم عمران خان آج چین کے 5 روزہ دورے پر روانہ ہوں گے
میڈیا رپورٹس کے مطابق دورہ چین کے موقع پر وزیراعظم چینی صدر اور اپنے چینی ہم منصب کے علاوہ دیگر اعلیٰ حکام سے ملاقاتیں اور دو طرفہ تجارت کے فروغ کے لیے بات کریں گے۔
وزیراعظم عمران خان آج چین کے 5 روزہ دورے پر روانہ ہوں گے۔
میڈیا رپورٹس کے مطابق دورہ چین کے موقع پر وزیراعظم عمران خان چینی صدر اور اپنے چینی ہم منصب کے علاوہ دیگر اعلیٰ حکام سے ملاقاتیں اور دو طرفہ تجارت کے فروغ کے لیے بات کریں گے۔
علاوہ ازیں دونوں ملکوں کے درمیان کئی معاہدوں پر دستخط بھی کیے جائیں گے۔
واضح رہے کہ اس سے قبل وزیراعظم نے کل چین روانہ ہونا تھا تاہم گذشتہ روز ان کے شیڈول میں تبدیلی کی گئی اور اب وہ آج روانہ ہوں گے۔
شیڈول کے مطابق وزیراعظم خصوصی طیارے سے بیجنگ پہنچیں گے جہاں چین کے نائب وزیر خارجہ اور دیگر حکام ان کا استقبال کریں گے جبکہ کل وہ چینی صدر سے ملاقات کریں گے۔
3 نومبر کو وہ تیان من سکوائر میں پیپلز ہیروز کی یادگار پر پھول چڑھائیں گے جبکہ اسی روز ان کی نیشنل پیپلز کانگریس کے چیئرمین سے ملاقات ہوگی۔
اسی روز وزیراعظم کے اعزاز میں گریٹ ہال میں خیرمقدمی تقریب ہوگی جہاں انہیں گارڈ آف آنر پیش کیا جائے گا۔
3 نومبر کو ہی وزیراعظم عمران خان مختلف معاہدوں پر دستخط کی تقریب میں چینی ہم منصب سے ملاقات کریں گے جس کے بعد وہ چینی وزیراعظم کی طرف سے دی گئی ضیافت میں جائیں گے۔
3 نومبر کو ہی وزیراعظم عمران خان کی چین کے سرمایہ کاروں اور کمپنیوں کے سربراہوں سے ملاقات طے ہے۔
4 نومبر کو وزیراعظم سینٹرل پارٹی سکول میں خطاب کے بعد شنگھائی روانہ ہوں گے جہاں وہ چائنا انٹرنیشنل امپورٹ ایکسپو میں بطور مہمان خصوصی شرکت کریں گے۔
چین کے صدر 4 نومبر کو امپورٹ ایکسپو میں شریک رہنماؤں کے اعزاز میں ضیافت دیں گے۔
وزیراعظم عمران خان 5 نومبر کو شنگھائی میں ویت نام کے وزیراعظم سے ملاقات کریں گے جبکہ اسی روز شنگھائی کی مقامی قیادت سے ملاقات اور پاکستان بزنس فورم سے خطاب کرنے کے بعد وطن واپس روانہ ہوں گے۔
