چین کو ہانگ کانگ سے ملانے والے دنیا کے طویل ترین بحری پل کا افتتاح کر دیا گیا

چین کے صدر شی چن پنگ نے چین کے جنوبی ساحلی شہر ژوہوئی میں تعمیر کیے گئے دنیا کے طویل ترین بحری کراسنگ برج کا افتتاح کردیا۔

بین الاقوامی خبر رساں ادارے کے مطابق 55 کلومیٹر طویل اس پل کی تکمیل میں 20 ارب ڈالر جبکہ 9 سال کا عرصہ لگا جس سے ہانگ کانگ اور مکاؤ کے ساتھ ہی نہیں بلکہ چین کے اپنے 11 شہروں کے درمیان  زمینی رابطہ بحال ہو گیا ہے۔

رپورٹ  کے مطابق انتہائی مضبوط اور ٹھوس ترین اسٹیل سے بنایا گیا پل سمندر کی ظالم لہروں کا مقابلہ کرنے کی صلاحیت رکھتا ہے اور اس پر بیک وقت ہزاروں گاڑیاں سفر کرسکتی ہیں، یوں اس پل کی تعمیر سے 68 ملین افراد ایک دوسرے سے منسلک گئے ہیں۔

رپورٹ کے مطابق پُل میں زیر سمندر 6.7 کلومیٹر طویل ٹنل بھی بنایا گیا ہے جس کیلئے مصنوعی جزیرہ بھی بنایا گیا ہے جس کے ساتھ شاندار روشنی کے علاوہ پل کے نیچے سے آبی جہازوں کے گزرنے کا انتظام کیا گیا ہے۔

ماہرین کا اس حوالے سے کہنا ہے کہ چین کو ہانگ کانگ سے ملانے والے اس پُل سے 11 شہروں کے درمیان نہ صرف فاصلہ کم ہوگیا ہے بلکہ معیشت اور تجارت کو بھی فروغ ملے گا اور معاشی سرگرمیوں میں اضافہ ہوجائے گا۔