قطر نے پاکستان میں ویزا سینٹر کے قیام کا اعلان کردیا

قطر نے پاکستان میں ویزا سنٹر کے قیام کا اعلان کردیا جس سے پاکستانیوں کو سفری سہولیات میسر آئیں گی۔

قطر کے سفارت خانے نے وزارت برائے اوورسیز پاکستانی کو لکھے گئے ایک خط میں وزیراعظم کے معاون خصوصی ذوالفقار بخاری کو بتایا کہ قطر کی ریاست نے پاکستان کو ان 8 ممالک میں سے ایک منتخب کیا ہے جہاں قطر میں کام کرنے کے خواہشمند افراد کی سہولت کے لیے قطر ویزا سنٹر قائم کیا جائے گا۔

واضح رہے کہ گزشتہ ماہ خلیجی ممالک میں قطر وہ پہلا ملک بن گیا تھا جس نے ملک میں کافی عرصے سے رہائش پذیر تارکین وطن کو شہریت دینے کا فیصلہ کیا تھا۔

اس حوالے سے نیا قانون جاری کرتے ہوئے قطری امیر شیخ تمیم بن حماد التہینی نے حکومت کو ہدایت کی کہ ہر سال 100 تارکین وطن کو شہریت دی جائے۔

علاوہ ازیں قطر میں ملازمت کرنے والے افراد کے لیے وطن واپس جانے سے قبل کفیل کی اجازت لینے کی شرط ختم کردی گئی جس کے بعد اب انہیں ایگزٹ ویزا لینے کی ضرورت نہیں پڑے گی۔

قبل ازیں اگست 2017 میں قطر نے پاکستانی پاسپورٹ رکھنے والوں کے لیے آمد پر ویزے کی سہولت متعارف کرائی تھی جس میں 30 روز کی توسیع بھی کی جا سکتی ہے۔